پاکستان کوسٹ گارڈز کی کارروائیاں،اسلحہ و منشیات برآمد

کراچی (صباح نیوز)پاکستان کوسٹ گارڈز نے مختلف کارروائیوں میں اسلحہ اور منشیات برآمد کرلیں۔پاکستان کوسٹ گارڈز نے پاک ایران سرحد کے قریب اولڈ میرین پوسٹ کے علاقے میں خفیہ اطلاعات پر سرچ آپریشن کر کے ایک کشتی کو قبضے میں لے لیا۔ کارروائی کے دوران 2 عدد ایل پی جی سلنڈرز برآمد کئے گئے جن میں اسلحہ اور منشیات کو چھپایا گیا تھا۔برآمد شدہ اشیا میں 34 کلوگرام آئس، 42 کلوگرام ہیروئن اور 5.56 ملی میٹر کیلیبر کی گولیاں شامل ہیں۔ پکڑے جانے والے اسلحہ، ہیروئن اور آئس کی بین الاقوامی مارکیٹ میں مالیت 26.2 ملین ڈالر ہے۔ترجمان کے مطابق پاکستان کوسٹ گارڈز عوام کی خدمت اور ملک کی حفاظت کے لئے ہر وقت تیار ہے اور ہر قسم کی غیرقانونی سرگرمیوں کے خلاف کارروائی کے لئے متحرک ہے۔