سعودی عرب میں مذاکرات کے بعد یمن کی علیحدگی پسند تنظیم سدرن ٹرانزیشنل کونسل کا خود کو تحلیل کرنے کا فیصلہ

ثنا (مانیٹرنگ ڈیسک) یمن کی علیحدگی پسند تنظیم سدرن ٹرانزیشنل کونسل (ایس ٹی سی) نے سعودی عرب میں ہونے والے مذاکرات کے بعد خود کو تحلیل کرنے کا فیصلہ کرلیا ہے۔ الجزیرہ کی رپورٹ کے مطابق ایس ٹی سی کے بعض اراکین اس وقت ریاض میں موجود ہیں، جہاں جمعے کو جنوبی یمن میں جاری بدامنی کے خاتمے سے متعلق بات چیت جاری ہے۔ سدرن ٹرانزیشنل کونسل کے اراکین نے ریاض میں منعقدہ ریاض سدرن ڈائیلاگ کانفرنس کے دوران خطاب کیا۔ اجلاس کے دوران کونسل نے کہا کہ حضرموت اور المہرہ میں فوجی کارروائیوں نے یمن میں جنوبی مقصد کو نقصان پہنچایا۔ کونسل نے واضح کیا کہ حضرموت اور المہرہ میں ان فوجی کارروائیوں کے فیصلے میں ان کی کوئی شمولیت نہیں تھی۔ کونسل کا کہنا تھا کہ ہم امید کرتے ہیں کہ ریاض کانفرنس میں جنوبی مسئلے کے حل کے لیے ایک واضح تصور اور لائحہ عمل تک پہنچا جا سکے گا۔ رپورٹ کے مطابق سدرن ٹرانزیشنل کونسل نے سعودی عرب کی جانب سے اٹھائے گئے اقدامات اور پیش کردہ مسائل کے حل کی تعریف کرتے ہوئے کہا کہ یہ اقدامات عوام کی ضروریات کو پورا کرتے ہیں۔ رپورٹ میں کہا گیا کہ یہ فیصلہ سعودی عرب اور متحدہ عرب امارات کے درمیان پیدا ہونے والے اختلافات میں کمی کا سبب بن سکتا ہے۔