روس پر مغربی پابندیاں اعلان جنگ کے مترادف ہیں، پیوٹن

روسی صدر ولادیمیر پوٹن نے خبردار کیا ہے کہ روس پر مغربی پابندیاں اعلان جنگ کے مترادف ہیں۔ روسی صدر کا کہنا ہے کہ یوکرین پر نو فلائی زون مسلط کرنے کی کسی بھی کوشش کو نیٹو کا اس جنگ میں شریک ہونے کے طور پر دیکھا جائے گا۔ گیارہ روز قبل روس کے یوکرین پر حملے کرنے کے بعد سے مغربی ممالک نے روس پر پابندیاں عائد کر رکھی ہیں۔ ان پابندیوں نے روسی کرنسی روبل کی قدر گرا دی ہے اور روسی مرکزی بینک کو شرح سود کو دگنا کرنے پر مجبور کر دیا ہے۔ پوٹن نے کہا کہ انہیں یقین ہے کہ وہ اپنی فوجی کارروائی کے تمام اہداف کو پورا کر لیں گے۔ انہوں نے یہ بھی کہا کہ ان کا روس میں مارشل لا لگانے کا کوئی منصوبہ نہیں ہے۔