کچھ ٹی وی چینلز اداروں کیخلاف گمراہ کن پروپیگنڈا کررہے ہیں، پیمرا

اسلام آباد (انتخاب نیوز) پاکستان الیکٹرانک میڈیا ریگولیٹری اتھارٹی (پیمرا) نے ریاستی اداروں کیخلاف گمراہ کن پروپیگنڈے پر تمام ٹی وی چینلز کو ہدایات جاری کر دیں۔ ایک بیان میں پیمرا کی جانب سے کہا گیا ہے کہ مشاہدے میں آیا ہے کہ کچھ ٹی وی چینلز ریاستی اداروں کیخلاف غلط معلومات پھیلا رہے ہیں، کچھ ٹی وی چینلز پر اینکرز اور تجزیہ کار غلط معلومات پھیلا رہے ہیں، چینلز پر اس طرح کے ٹرینڈز ریاستی اداروں کیخلاف منظم پروپیگنڈے کا حصہ ہیں۔ پیمرا کا کہنا ہے کہ ایسا مواد آن ایئر کرنا پیمرا کے کوڈ آف کنڈکٹ 2015ءکے اصولوں کی خلاف ورزی ہے، اس طرح کا مواد آن ایئر کرنا اعلیٰ عدالتوں کے طے شدہ اصولوں کی بھی خلاف ورزی ہے۔ پیمرا کے مطابق آئین کے آرٹیکل 19 کے تحت آزادی اظہار رائے ہر شہری کا بنیادی حق ہے، اظہار رائے کی آزادی کا حق قانون کے مطابق متعدد پابندیوں سے مشروط ہے، تمام ٹی وی چینلز اعلیٰ عدالتوں کے فیصلوں اور پیمرا قوانین پر سختی سے عملدرآمد کریں۔