وفاق و بلوچستان حکومت بارش متاثرین کا تماشہ نہ بنائیں، جماعت اسلامی

کوئٹہ (انتخاب نیوز) امیر جماعت اسلامی بلوچستان نے کہا ہے کہ وفاق وصوبائی حکومت بارش متاثرین کاتماشہ نہ کریں صرف اعلانات وفوٹوسیشن کے بجائے عملی طوراخلاص ودیانت سے متاثرین کی خدمت کریں۔الخدمت فاﺅنڈیشن سرگرمیوں ریلیف ورک میں مزیدتیزی وبہتری لائیں۔انہوں نے کہاکہ عدلیہ، انتظامیہ، سیاست، ریاستی اداروں میں تقرری، پروموشن میرٹ پر نہیں پسند ناپسند کی بنیاد پر ہورہی ہے۔ اختیارات کے ناجائز استعمال نے ریاستی نظام کو مفلوج کرکے رکھ دیا ہے عوام میں نفرت، بیزاری اور بغاوت پورے زور سے پروان چڑھ رہی ہے۔ عدالتی فیصلوں میں تضاد، سپریم کورٹ کے ججوں کے تقرر پر اتفاق نہ ہونا خود عدلیہ کی ساکھ پر بہت بڑا سوالیہ ہے 75 سال سے جاری بالادست حاکمانہ رویے اور عوام کو غلام جاننے کا ڈاکٹرائن ختم کرنا ہوگا آئین کی بالادستی، قومی وسائل کی منصفانہ تقسیم اور شفاف اور غیرجانبدارانہ انتخابات ہی اسلامی اور خوشحال پاکستان کی ضمانت ہے سرکاری ادارے لوٹ مار بند کریں، حب الوطنی کے جذبہ کے ساتھ اپنے اختیارات استعمال کریں۔ زوال پذیر معیشت کو سرکاری اہلکار اپنی کرپشن کے ذریعے مزید تباہ نہ کریں۔ درآمدات میں سود کا بوجھ، پٹرولیم مصنوعات، خوردنی تیل، سامان تعیشات معیشت کی تباہی کی جڑ ہے برآمدات، زرمبادلہ اور اندرونی وسائل سے درآمدات بڑھ جانے سے روپے کی مسلسل بے قدری اور ڈالر بے قابو ہے پیداواری لاگت بڑھ جانے سے پورا اقتصادی سرکل جام ہے عمران خان کی طرح اتحادی حکومت نے بھی عوام کی چیخیں نکلوانے کاعمل جاری رکھا ہوا ہے۔علما و مشائخ منصفانہ اسلامی نظام کے قیام کے لیے عوام کی ذہن سازی کریں۔ اللہ تعالی کے قایم کردہ نظام کے مقابلے میں سارے نظام ناکام ہیں انسانی نظاموں نے عوام میں اقتدار کی ہوس، نفسانفسی، کرپشن، تعصبات اور بدانتظامی پیدا کی ہے ۔