کوئٹہ ریڈ زون دھرنے کے 48 روز، لواحقین بیمار پڑنے لگے، مطالبات کی منظوری کے منتظر

کوئٹہ (انتخاب نیوز) کوئٹہ ریڈ زون میں جاری بلوچ لاپتہ افراد لواحقین کے دھرنے کو اڑتالیس 48 دن ہوگئے، لواحقین مسلسل بیمار ہونے لگے۔ زیارت واقعے کے بعد گورنر ہاؤس کے سامنے ریڈ زون میں جاری بلوچ لاپتہ افراد کے لواحقین کے جاری احتجاجی دھرنے کو آج 48 دن مکمل ہوگئے۔ اڑتالیس دن مسلسل احتجاج جاری رکھنے سے اکثر لواحقین بیمار پڑگئے ہیں، احتجاجی کیمپ میں ان کے طبی امداد جاری ہے۔ موسم کی شدت میں مسلسل احتجاج سے لواحقین کمزور اور بیمار ہورہے ہیں لیکن مطالبات کی منظوری میں اب تک کوئی پیشرفت ممکن نہیں ہوئی ہے۔ اس حوالے سے لواحقین نے کہا کہ انہیں امید ہے کہ گزشتہ دنوں جبری گمشدگیوں پر قائم کردہ وفاقی کمیٹی جلد دھرنے کے مقام پر آکر ان سے ملے گی اور ان کے جائز مطالبات پر عملدرآمد کریں گے۔ واضح رہے کہ 21 جولائی سے جاری دھرنے کے دوران ابھی تک بلوچستان میں روزانہ کی بنیاد پر جبری گمشدگیوں کا سلسلہ تھما نہیں بلکہ اسی دوران سیکورٹی فورسز کی جانب سے نام نہاد آپریشن کے نام پر فیک انکاؤنٹر میں لوگوں کے قتل کے پانچ واقعات بھی رپورٹ ہوئے ہیں، جن سے یہ اخذ کیا جاسکتا ہے کہ جبری گمشدگیوں اور فیک انکاؤنٹر کا روکنے میں ریاست اب تک سنجیدہ نہیں ہے۔