بگ بیش لیگ،سڈنی تھنڈرنے15 رنز پر آؤٹ ہو کر ٹی 20کا نیا ریکارڈ بنا ڈالا

ایڈیلیڈ(مانیٹرنگ ڈیسک)آسٹریلیا میں جاری بِگ بیش لیگ میں سِڈنی تھنڈر نے ایڈیلیڈ اسٹرائیکرز کے خلاف میچ میں 15 رنز پر آؤٹ ہو کر مینز ٹی 20 کرکٹ میں کم اسکور پر آؤٹ ہونے کا ریکارڈ بنا دیا۔جمعے کے روز ایڈیلیڈ اوول میں کھیلے گئے میچ میں سِڈنی تھنڈر کی پوری ٹیم 140 رنز کے تعاقب میں صرف 5.5 اوورز کھیل سکی اور 15 رنز بنا کر اؤٹ ہوگئی۔تھنڈر کی جانب سے پانچ بیٹرز صفر پر آؤٹ ہوئے۔ جبکہ پوری اننگ میں صرف ایک چوکا لگا۔ایڈیلیڈ اسٹرائیکرز کے ہینری تھورٹن نے 2.5 اوورز میں 3 رنز دے کر 5 کھلاڑی آؤٹ کیے جبکہ ویس ایگر نے 2 اوورز میں 6 رنز دے کر 4 کھلاڑیوں کو پویلین کی راہ دِکھائی۔ میتھیو شارٹ نے بھی ایک وکٹ حاصل کی۔اس سے قبل ایڈیلیڈ اسٹرائیکرز نے ٹاس جیت کر پہلے بیٹنگ کرتے ہوئے مقررہ 20 اوورز میں 9 وکٹوں کے نقصان پر 139 رنز بنائے۔ایڈیلیڈ کی جانب سے کرس لِن 36 اور کولن ڈی گرینڈہوم 33 رنز بنا کر نمایاں رہے۔سڈنی تھنڈر کی جانب سے فضل حق فاروقی نے 3 جبکہ گریندر سندھو، ڈینیئل سیمز اور برینڈن ڈوجیٹ نے 2،2 کھلاڑیوں کو آؤٹ کیا۔واضح رہے اس سے پہلے پروفیشنل ٹی ٹوئنٹی میچ میں کم اسکور پر آؤٹ ہونے کا ریکارڈ ترکی کے پاس تھا۔ 2019 میں چیک ریپبلک کےخلاف ترکی کی ٹیم صرف 21 رنز ہی بنا سکی تھی۔