تھرکول کوئلے سے 1320 میگاواٹ پاور پلانٹ سے بجلی کی پیداوار شروع

کراچی (انتخاب نیوز) چین پاکستان اقتصادی راہداری کے تحت 1320میگا واٹ کے پاور پلانٹ نے بجلی کی پیداوار شروع کر دی ، بجلی کی پیداوار مقامی کوئلے کے ذریعے کی جائے گی۔ شنگھائی الیکٹرک کے ذیلی ادارے تھر کول بلاک1پاور جنریشن کمپنی کے مطابق مقامی کوئلے سے 1320میگا واٹ بجلی کی پیداوار کے حامل پلانٹس نے ریلائیبلٹی رن ٹیسٹ کی کامیاب تکمیل کے بعد کمرشل آپریشن شروع کر دیا ہے۔اس منصوبے کی سالانہ پیداواری صلاحیت 9 ارب یونٹس ہے جو 40 لاکھ مقامی گھرانوں کی توانائی کی طلب کو پورا کر سکتی ہے۔ مقامی کوئلے کے استعمال کی وجہ سے ایندھن کے درآمدی بل کی مد میں بھی کمی ہو گی۔شنگھائی الیکٹرک کے تھرکول بلاک 1کے کمرشل منیجر آصف علی کی طرف سے پوسٹ کی گئی ایک ویڈیو میں دیکھا جا سکتا ہے کہ کامیابی پر پاور پلانٹ کے چینی اور مقامی عملے کی جانب سے خوشی کا اظہار کیا جارہا ہے۔ریلائیبلٹی رن ٹیسٹ کا دورانیہ 168 گھنٹے طویل تھا۔ر ن ٹیسٹ کے مکمل ہونے کے قریب پہنچتے ہی عملہ گنتی کر رہا ہے اور اس کے کامیابی سے مکمل ہونے پر ایک دوسرے کو مبارکباد دی گئی اور نعرے بھی لگائے گئے۔ آصف علی نے بتایا کہ ابتدائی ٹیسٹ کے تمام مراحل کامیابی سے مکمل ہوئے ہیں اور1320 میگاواٹ کے تھر کول پاور پلانٹ نے کامیابی سے پیداوار شروع کر دی ہے۔ریلائیلبٹی رن ٹیسٹ 28 جنوری کو شروع ہوا اور پلانٹ نے بتدریج طے شدہ معیار کے مطابق ٹیسٹ کے لیے مکمل بوجھ حاصل کر لیا۔ یہ پلانٹ اب مقامی کوئلے سے 1320 میگاواٹ سستی بجلی قومی گرڈ میں فراہم کر رہا ہے۔چین پاکستان اقتصادی راہداری کے تحت تھر میں کوئلے کی کان کنی اور پاور پلانٹ کے منصوبوں کی بدولت تھر کا کوئلہ اب قومی توانائی مکس میں 2640 میگاواٹ بجلی فراہم کر رہا ہے۔