ہر نئے پلستر کی رونمائی کے ساتھ ہی عمران خان نیا جھوٹ اورالزام لگاتے ہیں، مریم اورنگزیب

اسلام آباد(مانیٹرنگ ڈیسک)وفاقی وزیر برائے اطلاعات ونشریات مریم اورنگزیب نے کہا ہے کہ ہر نئے پلستر کی رونمائی کے ساتھ ہی عمران خان نیا جھوٹ ، ایک نیا الزام لگاتے ہیں جوتخریب کاری، کشمیر، قومی سلامتی پر قومی قیادت کے ساتھ مل کر بیٹھنے کو تیار نہیں،شہداء کے خلاف غلیظ مہم چلانے والا،ہزارہ برادری کے جنازوں پر کہے کہ بلیک میل نہیں ہوں گا، وہ ملک کو اکٹھا کرے گا؟۔ان خیالات کااظہار مریم اورنگزیب نے جمعرات کے روز ٹوئٹر پر جاری اپنے بیان میں کیا۔ مریم اورنگزیب نے کہا کہ قوم میں نفرت،بدتہذیبی، تقسیم کا زہر گھولنے والا اداروں کے خلاف زہر اگل رہا ہے ۔ہارے ہوئے نالائق نااہل گھڑی چور،کرپٹ بہروپیے کی کسی کو فکر نہیں۔بکتر بند زمان پارک خواتین اور بچوں کے حصار سے نکلیں۔عمران خان اداروں کے خلاف اپنے جھوٹے بیانات سے تخریب کاروں کی مدد کر رہا ہے۔ مریم اورنگزیب نے اپنے بیان کے ساتھ عمران خان کا ویڈیو کلب پر شیئر کیا ہے جس میں عمران خان کہہ رہے ہیں کہ ایشو یہ ہے کہ اس ملک کی آئی ایس آئی یعنی فوج کی قیادت کس حدتک چلی گئی ہے کہ جو ملک کی سب سے بڑی پارٹی کا لیڈر ہے جوملک کو اکٹھا کرسکتا ہے اس کو مارنے کیلئے تیار ہیں۔