مغربی کنارے میں اسرائیلی فوج کی فائرنگ سے فلسطینی جاں بحق ، 3 زخمی

رملہ(مانیٹرنگ ڈیسک) مغربی کنارے میں اسرائیلی فوج کی فائرنگ سے ایک فلسطینی شہید ہو گیا۔ عرب میڈیا کی رپورٹ کے مطابق فلسطینی نوجوان کو اسرائیلی فوج نے کار میں نشانہ بنایا۔ رپورٹ میں عینی شاہدین کا حوالہ دیتے ہوئے بتایا گیا ہے کہ اسرائیلی فوج نے زخمی فلسطینی کو طبی امداد دینے سے روکا ، خون زیادہ بہہ جانے سے زخمی فلسطینی دم توڑ گیا۔رپورٹ کے مطابق جاں بحق ہونے والے نوجوان کی شناخت 24سالہ محمد رئید برادیہ کے نام سے ہوئی ہے۔اسرائیلی فوج نے اس حوالے سے کہا ہے کہ نوجوان کو گولی مار کر اس وقت ہلاک کیا گیا جب اس نے اپنی گاڑی فوجیوں کے ایک گروپ سے ٹکرائی۔ اسرائیلی طبی ماہرین نے بتایا ہے کہ اس واقعے میں 3 افراد زخمی ہوئے ہیں جن میں سے 2 کی حالت تشویش ناک ہے۔ گزشتہ روز ایک اور واقعے میں اسرائیلی پولیس نے مقبوضہ مشرقی مقبوضہ بیت المقدس میں مسجدِ اقصی کے باہر ایک فلسطینی شخص کوفائرنگ کر کے قتل کر دیا تھا۔ رپورٹ میں عینی شاہدین کا حوالہ دیتے ہوئے بتایا گیا ہے کہ پولیس نے مسجد کے احاطے کی طرف جانے والی ایک خاتون کو ہراساں کرنے سے روکنے کی کوشش کرنے والے 26 سالہ محمد خالد العصیبی کو کم از کم 10 گولیاں ماریں۔واضح رہے کہ رواں سال اسرائیلی فوج کی پرتشدد کارروائیوں میں 92فلسطینی شہید ہو چکے ہیں۔