سعودی عرب، حسن قرات کا بڑا مقابلہ ایرانی قاری نے جیت لیا
ریاض (مانیٹرنگ ڈیسک)سعودی عرب میں ہونے والا حسن قرات کا دنیا کا سب سے بڑا مقابلہ ایرانی قاری یونس شاہ مرادی نے جیت لیا۔سعودی عرب میں دنیا کے سب سے بڑے قرات اور اذان کے بین الاقوامی مقابلے ’عطر الکلام‘ (کلام کی خوشبو) کا انعقاد کیا گیا۔حسن قرات کا پہلا انعام ایران کے یونس شاہ مرادی اور خوبصورت اذان کا پہلا انعام سعودی شہری محمد آل الشریف نے حاصل کیا ہے۔سعودی محکمہ تفریحات کے سربراہ ترکی آل الشیخ نے مقابلے میں کامیاب ہونے والے 20 افراد کو بارہ ملین ریال سے زیادہ کے انعامات دیے۔عرب میڈیا کے مطابق حسن قرات میں پہلی پوزیشن حاصل کرنے والے ایرانی یونس شاہ مرادی کو 30 لاکھ سعودی ریال ( 23 کروڑ روپے) کاانعام دیا گیا جبکہ خوبصورت اذان کے پہلے انعام یافتہ سعودی شہری محمد آل الشریف کو 20 لاکھ ریال تحفے میں پیش کیے گئے۔تلاوت میں سعودی عرب کے عبد العزیز الفقیہ نے دوسری پوزیشن حاصل کرکے 20 لاکھ ریال اور مراکش کے زکریا الزریک نے تیسری پوزیشن حاصل کرکے 10 لاکھ ریال انعام حاصل کیا، مراکش کے ہی عبد اللہ الدغری نے چوتھی پوزیشن پر آکر 7 لاکھ ریال انعام پایا۔اذان اور قرات کا مقابلہ ’عطر الکلام‘ نے گنیز بک آف ورلڈ ریکارڈ میں چھ اعزاز اپنے نام کیے ہیں۔ قرات کے مقابلے میں بڑی تعداد میں شریک ممالک کے حوالے سے یہ پہلا مسابقہ ہے جسے گنیز بک آف ورتلڈ ریکارڈ میں شامل کیا گیا ہے۔ شریک ممالک کی تعداد کے حوالے سے یہ اذان کا سب سے بڑامسابقہ تسلیم کیا گیا۔ قرات کے مقابلے میں شرکت کرنے والوں کی تعداد کے حوالے سے گنیز بک آف ورلڈ ریکارڈ کا حصہ بن گیا۔
