ٹک ٹاک نے دسمبر 2022ء کے دوران پاکستانی صارفین کی سوا کروڑ سے زائد وڈیوز حذف کردیں

کراچی (مانیٹرنگ ڈیسک ) مقبول ترین سوشل میڈیا ایپ ٹک ٹاک نے اکتوبر سے دسمبر 2022ءکے دوران پاکستانی صارفین کی سوا کروڑ سے زائد وڈیوز حذف کر دی ہیں۔ واضح رہے کہ ٹک ٹاک پر روزانہ ہی کروڑوں وڈیوز اپ لوڈ ہوتی ہیں جن کے مواد کی جانچ پڑتال کمیونٹی گائیڈ لائنز کے اصولوں کے تحت ہوتی ہے۔ کمپنی نے اکتوبر سے دسمبر 2022ءکے دوران کمیونٹی گائیڈ لائنز کے اصولوں کی خلاف ورزی کرنے والی وڈیوز کیخلاف کارروائی کے بارے میں ایک رپورٹ میں بتایا۔ رپورٹ کے مطابق ٹک ٹاک نے اکتوبر سے دسمبر 2022ءکے دوران دنیا بھر میں 8 کروڑ 56 لاکھ 80 ہزار سے زیادہ وڈیوز کو کمیونیٹی گائیڈ لائنز کی خلاف ورزی پر پلیٹ فارم سے ہٹایا۔ یہ تعداد اس عرصے میں ٹک ٹاک پر پوسٹ کی جانے والی مجموعی ویڈیوز کے 0.6 فیصد کے برابر ہے۔ پاکستان میں اس عرصے کے دوران ایک کروڑ 26 لاکھ 28 ہزار سے زیادہ وڈیوز کو حذف کیا گیا۔ کمپنی نے بتایا کہ کمیونٹی گائیڈ لائنز کی خلاف ورزی کرنے والے مواد کو حذف کرنے کے ساتھ ساتھ اسپام قرار دیے گئے اکاو¿نٹس اور ان کی جانب سے پوسٹ کی گئی ویڈیوز بھی حذف کی گئیں۔ اکتوبر سے دسمبر 2022ءکی سہ ماہی کے دوران پاکستان میں، 89.7 فیصد وڈیوز کسی صارف کی جانب سے دیکھے جانے سے پہلے حذف کی گئیں۔ اس عرصے میں عالمی سطح پر ایک کروڑ 78 لاکھ 77 ہزار سے زیادہ ایسے اکاﺅنٹس پلیٹ فارم سے حذف کیے گئے جن کے بنانے والوں پر 13 برس سے کم عمر ہونے کا شبہ تھا۔ کمپنی کے مطابق 5 کروڑ 44 لاکھ سے زیادہ ایسی وڈیوز بھی حذف کی گئیں جن کا تعلق جعلی اکاﺅنٹس سے تھا۔ ٹک ٹاک نے بتایا کہ سوشل میڈیا پلیٹ فارم کی پالیسیوں کا ہر شخص پر یکساں اطلاق ہوتا ہے اور ہر قسم کے مواد کی جانچ پڑتال کی جاتی ہے۔