پوری قوم پیر کو سپریم کورٹ کے باہر پرامن احتجاج میں شرکت کےلئے پہنچے ، مولانا فضل الرحمن کا پیغام

اسلام آباد (این این آئی) پی ڈی ایم کے سربراہ مولانا فضل الرحمان نے پی ڈی ایم اور جے یو آئی کے کارکنوں اور عوام کے نام وڈیو پیغام میں کہا ہے کہ پوری قوم پیر کے روز سپریم کورٹ کے باہر پرامن احتجاج میں شرکت کے لئے پہنچے۔ اپنے بیان میں انہوںنے کہاکہ صبح نو بجے تمام قافلے پہنچ جائیں تاکہ قومی یکجہتی قائم کی جائے۔ مولانا فضل الرحمن نے کہاکہ تین رکنی بینچ اور ہائی کورٹ کے ججوں نے ایک مجرم کو تحفظ دیا ہے،ہم نے اپنے اداروں کا تحفظ کرنا ہے اور ججز کے بگاڑ کو سیدھا کرنا ہے۔ انہوںنے کہاکہ ججز پاکستان کے غریب عوام کے ٹیکسوں سے تنخواہ لیتے ہیں،ججز آج آئین، قانون اور عدالتی روایات کو پامال کر رہے ہیں۔ انہوںنے کہاکہ یکطرفہ طور پر ایک مجرم کو تحفظ دیا جارہا ہے، اور اسے وی آئی پی پروٹوکول دیا جارہا ہے۔ مولانا فضل الرحمن نے کہاکہ مجرم کی حوصلہ افزائی کی جارہی ہے تاکہ وہ آئندہ بھی جرائم کرے اور معیشت کو تباہ کرے۔ انہوںنے کہاکہ ایک مجرم کی حوصلہ افزائی کی جارہی ہے تاکہ وہ آئندہ بھی ملک کو اتنا کمزور کرے کہ ملک پارہ پارہ ہو جائے۔ انہوںنے کہاکہ ہم پہلے بھی میدان میں رہے ہیں، آج ایک بار میدان میں آنے کی ضرورت پڑی ہے۔ انہوںنے کہاکہ ہم عوام اور کارکنوں کو دعوت دے رہے ہیں کہ وہ پیر کی صبح شاہراہ دستور پہنچیں،انصار الاسلام کے سالار اور رضاکار نظم کو برقرار رکھنے کےلئے پہنچیں۔ مولانا فضل الرحمن نے کہاکہ وکلاءبرادری سے بھی اپیل کرتا ہوں کہ وہ قانون کو تحفظ دینے کے لئے احتجاج میں بھرپور شرکت کریں۔ انہوںنے کہاکہ آئین کی بالادستی کی جنگ لڑنی ہے، وکلاءنے ہمیشہ اس مقصد کے لئے قربانیاں دی ہیں،آج ایک بار پھر ضرورت پڑی ہے کہ وکلاءبھی میدان میں آئیں،ہر سیاسی جماعت کے کارکنوں کو اپیل کرتا ہوں کہ وہ اس احتجاج کو قومی احتجاج بنائیں۔ انہوںنے کہاکہ اداروں کی اس طرح کی بے راہ روی، جانبداری اور اپنے اختیارات سے تجاوز پر قوم احتجاج کرتی ہے،شاہراہ دستور پر اکٹھے ہوکر مضبوط پیغام دیں گے کہ عدالت اپنے اس رویے سے باز آجائیں۔