لندن میں نواز شریف کے نام پر چوتھی گاڑی رجسٹرڈ کروالی گئی، پولیس نے تحقیقات شروع کردی

لندن (مانیٹرنگ ڈیسک) لندن میں سابق وزیراعظم نواز شریف کے نام پر نامعلوم افراد نے چوتھی گاڑی رجسٹرڈ کروالی۔ سٹی آف لندن پولیس سازش کرنے والوں تک پہنچنے کیلئے تحقیقات میں مصروف ہے۔ نوازشریف لندن آفس کے مطابق گاڑیاں نوازشریف کے نام پر رجسٹرڈ کروانے کا مقصد جرائم کرکے تعلق نوازشریف سے جوڑنا ہوسکتا ہے۔ لندن آفس کا کہنا ہے کہ نوازشریف کے نام پر رجسٹرڈ گاڑیوں کو تخریب کاری، دھوکا دہی اور مجرمانہ کارروائیوں کیلئے استعمال کیاجاسکتا ہے۔ نواز شریف لندن آفس کے خرم بٹ نے پولیس کو چوتھی گاڑی رجسٹرڈ ہونے سے بھی آگاہ کردیا۔ گزشتہ دنوں گاڑیاں رجسٹرڈ ہونے کا معاملہ اس وقت سامنے آیا تھا جب نوازشریف کے نام رجسٹرڈ گاڑی کی تفصیل ڈی وی ایل اے نے ایون فیلڈ بھیجی تھی، مارچ 2023ءمیں نواز شریف آفس نے ڈی وی ایل اے کو فراڈ سے آگاہ کیا اور پھر اپریل 2023ءمیں ایک اور گاڑی نواز شریف کے نام پر رجسٹرڈ کی گئی۔ نواز شریف کے نام پر تیسری گاڑی کا اس وقت پتہ چلا جب ٹریفک قواعد کی خلاف ورزی کا جرمانہ وصول ہوا۔ اس حوالے سے خرم بٹ کا کہنا تھاکہ چند شرپسند عناصر نواز شریف کا نام اپنے مجرمانہ مقاصد کیلئے استعمال کرنے کی کوشش کررہے ہیں، دوسروں کے نام پر گاڑی رجسٹرڈ کرانے والے جلد پکڑے جائیں گے۔