سعودی عرب اور کینیڈا کا 6 سال بعد سفارتی تعلقات بحال کرنے کا اعلان
اوٹاوا /ریاض(مانیٹرنگ ڈیسک) کینیڈا اور سعودی عرب نے تمام تنازعات کو ختم کر کے 6سال بعد سفارتی تعلقات بحال کرنے کا فیصلہ کردیا۔غیر ملکی خبررساں ادارے کی رپورٹ کے مطابق سعودی عرب اور کینیڈا نے 2018سے جاری تنازعات کو ختم کرنے کا اعلان کرتے ہوئے اپنے سفارتی تعلقات بحال کر کے سفیروں کی تقرری کا اعلان کیا ہے۔یہ فیصلہ کینیڈا کے وزیر اعظم جسٹن ٹروڈو اور سعودی ولی عہد محمد بن سلمان کے درمیان بنکاک میں فورم کے سربراہی اجلاس کے موقع پر ہونے والی بات چیت کے بعد کیا گیا۔ سعودی وزارت خارجہ کی جانب سے جاری اعلامیے کے مطابق کینیڈا اور سعودی عرب کے درمیان سفارتی تعلقات کی بحالی دونوں کی خواہش تھی جس کی بنیاد پر باہمی احترام اور مشترکہ مفادات کو مدنظر رکھتے ہوئے بدھ کے روز فیصلہ کیا گیا ہے۔ اعلامیے میں کہا گیا ہے کہ سعودی ولی عہد اور کینیڈین وزیر اعظم جسٹن ٹروڈو نے ملاقات میں سفارتی تعلقات پرانی صورت حال پر بحال کرنے کا فیصلہ کیا ہے۔ کینیڈا کی جانب سے جاری اعلامیے میں کہا گیا ہے کہ پہلے مرحلے میں سفیروں کی تقرری کا عمل مکمل کیا جائے گا اور پھر سعودی عرب پر عائد پابندیاں اٹھا لی جائیں گی۔
