ترکیہ کے نومنتخب صدر طیب اردوان 3 جون کو عہدے کا حلف اٹھائیں گے

انقرہ(صباح نیوز)ترکیہ کے نومنتخب صدر رجب طیب اردوان 3جون کو تیسری مدت کے لئے اپنے عہدے کا حلف اٹھائیں گے اور نئی کابینہ کا ایک دن بعد حلف اٹھانے کا امکان ہے۔روسی خبر رساں ادارے کی رپورٹ کے مطابق نومنتخب ترک صدر ہفتہ کو حلف اٹھائیں گے اور عہدہ سنبھالیں گے جبکہ کابینہ کے ارکان کی حلف برداری اتوار کومتوقع ہے جس کے بعد نئی حکومت اپنا کام شروع کر دے گی۔حکمران جسٹس اینڈ ڈویلپمنٹ پارٹی (اے کے پی)کے ترجمان عمر چیلک نے کہا کہ رجب طیب اردوان حلف اٹھانے کے فورا بعد نئی کابینہ کا اعلان کر سکتے ہیں۔ موجودہ کابینہ میں سے صرف تین وزراء کے اپنے عہدوں پر برقرار رہنے کی توقع ہے جن میں خارجہ امور، داخلہ اور دفاع کے وزرا شامل ہیں ۔