چیئرمین سینیٹ وفد کے ہمراہ روس کے چار روزہ دورے پر ماسکو پہنچ گئے

ماسکو(صباح نیوز) چیئرمین سینیٹ محمد صادق سنجرانی روس کے چار روزہ دورے پر ماسکو پہنچ گئے ، سینیٹرز کے ایک وفد ان کے ہمراہ ہے۔ سینیٹ سیکرٹریٹ کے مطابق روس کی فیڈرل اسمبلی کی فیڈریشن کونسل کی سپیکر، ویلنٹینا میٹیوینکو کی دعوت پر روس کے چار روزہ دورے پر وفد ماسکو پہنچا ہے ۔ چیئرمین سینیٹ محمد صادق سنجرانی اور ان کے ہمراہ وفد ماسکو کے ڈوموڈیڈوو ایئرپورٹ پہنچے ۔ معزز وفد کو روس کی جانب سے فیڈریشن کونسل اور اسلامی جمہوریہ پاکستان کی سینیٹ کے درمیان تعاون کے گروپ کے سربراہ چیزوف ولادیمیر الیکسیویچ نے خوش آمدید کہا۔ مزید برآںروس میں اسلامی جمہوریہ پاکستان کے سفیر شفقت علی خان پاکستان کی جانب سے وفد کے استقبال کے لئے موجود تھے۔