چین نے لشکر طیبہ کے رکن ساجد میر کو عالمی تخریب کار قرار دلوانے کی بھارتی تجویز کو ویٹو کردیا

نیو یارک (این این آئی) چین نے اقوام متحدہ کی سکیورٹی کونسل میں ممبئی حملوں کے مبینہ ملزم اور لشکر طیبہ کے سینئر رکن ساجد میر کو عالمی تخریب کار قرار دینے کی بھارت اور امریکہ کی تجویز کو ویٹو کردیا۔ امریکہ نے ساجد میر پر پانچ ملین امریکی ڈالر کا انعام بھی رکھا ہے۔ غیر ملکی خبر رساں ادارے کے مطابق ساجد میر بھارت کے انتہائی مطلوب اشخاص میں سے ایک ہیں اور بھارت انہیں 2008ءکے ممبئی حملے کا اہم سازشی قرار دیتا ہے۔ 26/11 کے ممبئی حملوں میں ساجد کے مبینہ کردار کےلئے امریکہ نے ان کے سر پر 5 ملین امریکی ڈالر کا انعام بھی رکھا ہوا ہے۔ امریکی محکمہ خارجہ نے کہا کہ ساجد میر حملوں کےلئے لشکر طیبہ کے آپریشنز منیجر تھے، جنہوں نے ان کی منصوبہ بندی، تیاری اور عملدرآمد میں اہم کردار ادا کیا، گزشتہ سال اکتوبر میں بیجنگ نے حافظ سعید کے بیٹے طلحہ سعید کو فہرست میں شامل کرنے کی تجویز کو روکا تھا۔ یہ تجویز بھارت کی طرف سے پیش کی گئی تھی اور امریکہ نے اس کی حمایت کی تھی۔ یہ پانچویں مرتبہ ہے جب چین نے حالیہ مہینوں میں بھارت اور امریکہ کی تجویز کو بلاک کیا ہے۔بیجنگ نے اکتوبر میں شاہد محمود، ستمبر میں ساجد میر، جون میں عبدالرحمان مکی اور اگست میں مسعود اظہر کے بھائی عبدالرﺅف اظہر کو تحفظ فراہم کیا۔