آواران سے لاپتا عبدالحئی بلوچ کو بحفاظت بازیاب کرایا جائے، وی بی ایم پی

کوئٹہ (پ ر) وائس فار بلوچ مسنگ پرسنز کے چیئرمین نصراللہ بلوچ نے اپنے بیان میں کہا کہ ڈاکٹر عبدالحئی کی جبری گمشدگی کی تفصیلات ان کے اہلخانہ نے وی بی ایم پی کو فراہم کردیں۔ انہوں نے تنظیم سے شکایت کی کہ ڈاکٹر عبدالحئی ولد محمد اسلم کو رواں سال یکم جون کو آواران شہر سے انکے کلینک سے لاپتہ کیا گیا، خاندان کو ڈاکٹر عبدالحئی کے حوالے سے معلومات بھی فراہم نہیں کی جارہی جسکی وجہ سے خاندان ذہنی کرب و اذیت میں مبتلا ہے، تنظیمی سطح پر ڈاکٹر عبدالحئی کے اہلخانہ کو یقین دہانی کرائی گئی کہ ان کے کیس کو لاپتہ افراد کے حوالے سے بنائے گئے کمیشن اور حکومت فراہم کیا جائے گا اور ان کی بحفاظت بازیابی کے لیے ہر فورم پر آواز اٹھائی جائے گی۔ نصراللہ بلوچ نے کہا کہ ڈاکٹر عبدالحئی ایک معزز پیشے سے تعلق رکھتا ہے جس کی جبری گمشدگی باعث تشویش اور ملکی قوانین و انسانی حقوق کی سنگین خلاف ورزی ہے، جس کی شدید الفاظ میں مذمت کرتے ہیں اور حکومت سے مطالبہ کرتے ہیں کہ وہ ڈاکٹر عبدالحئی کی جبری گمشدگی کا نوٹس لے اور ان کی بازیابی کو فوری طور پر یقینی بنائے اور اگر ان پر کوئی الزام ہے تو انہیں منظر عام پر لا کر عدالت میں پیش کیا جائے تاکہ ان کے خاندان کو ذہنی کرب و اذیت سے نجات مل سکے۔