امریکی صدر جوبائیڈن کورونا میں مبتلا،انتخابی سرگرمیاں معطل

واشنگٹن(صباح نیوز)امریکی صدر جوبائیڈن کورونا میں مبتلا ہوگئے، جس کے بعد انہوں نے تمام انتخابی سرگرمیاں معطل کردیں۔ غیرملکی خبررساں ادارے کے مطابق ترجمان وائٹ ہائوس نے تصدیق کرتے ہوئے کہا کہ جوبائیڈن کو کورونا کی معمولی علامات ہیں، انہیں ویکسین لگادی گئی ۔ان کی پریس سکرٹری کیرین جین نے کہا کہ امریکی صدر کو ویکسین لگائی گئی ، اس سے قبل بھی ان کا دو بار کورونا مثبت آ چکا ہے۔81 سالہ جوبائیڈن بدھ کے روز لاس ویگاس میں حامیوں سے ملے تھے اور ایک تقریب سے خطاب کیا تھا، بعد ازاں انہوں نے انتخابی مہم کی تقریر منسوخ کر دی ۔ان کا کورنا ایسے وقت میں مثبت آیا ہے، جب انہیں اپنی عمر کی وجہ سے پیچھے ہٹنے کے لیے بڑھتے ہوئے دبا کا سامنا ہے۔محترمہ کیرین جین نے کہا کہ صدر نے ڈیلاویئر میں اپنے گھر میں قرنطینہ کرنے کا ارادہ کیا ہے، جبکہ وہ اس وقت کے دوران اپنے تمام فرائض پوری طرح سے انجام دیتے رہیں گے۔صدر کے ڈاکٹر کیون او کونر نے بتایا کہ جوبائیڈن کو چند علامتیں ہیں، جن میں ناک بہنا اور کھانسی شامل ہے، انہیں دوائی کی پہلی خوراک دے دی گئی ۔بعد ازاں، امریکی صدر جو بائیڈن نے سماجی رابطے کی ویب سائٹ ایکس پر نیک خواہشات کا اظہار کرنے والے افراد کا شکریہ ادا کرتے ہوئے کہا کہ وہ صحت یاب ہونے کے دوران امریکی عوام کے لئے کام کرتے رہیں گے۔