پنجاب کے عوام کو سموگ کے رحم و کرم پر چھوڑ کر باپ بیٹی یورپ کی سیر پر نکلے ہیں،بیرسٹرسیف

پشاور(صباح نیوز) مشیرِ اطلاعات خیبر پختونخوا بیرسٹر محمد علی سیف نے کہا ہے کہ پنجاب کے عوام کو سموگ کے رحم و کرم پر چھوڑ کر باپ بیٹی یورپ کی سیر پر نکلے ہیں۔ایک بیان میں بیرسٹر سیف نے کہا ہے کہ باپ بیٹی جنیوا کی تازہ ہواﺅں میں گھوم رہے ہیں، اطلاعات ہیں مریم نواز نے پرائیویٹ جیٹ ہائیر کیا ہوا ہے۔انہوں نے کہا کہ جہاز نے صندوقوں اور سوٹ کیسز سے بھر کر اڑان بھری ہے، ملک کی حالت قابل رحم ہے اور ان کے شاہی خرچے ختم ہونے کا نام نہیں لے رہے۔ بیرسٹر سیف نے کہا کہ پنجاب میں بدترین سموگ کی وجہ سے زندگی کے معمولات معطل ہیں، باپ بیٹی کا جنیوا میں گھومنا پنجاب کے عوام کے ساتھ مذاق ہے۔پی ٹی آئی کے رہنما نے کہا کہ فارم 47 کے لیڈروں سے یہی توقع کی جا سکتی ہے، فارم 47 والے عوام کا مذاق اڑاتے ہیں، یورپ میں سرجری اور علاج کرانا پنجاب کے ہسپتا لوں کی کارکردگی پر سوالیہ نشان ہے۔مشیرِ اطلاعات خیبر پختونخوا نے کہا کہ کئی باریاں لینے کے باوجود ایک ہسپتا ل ایسا نہیں بنایا جہاں اپنا علاج کرا سکیں، پنجاب کے ہسپتال ادویات کی قلت اور بنیادی سہولتوں سے محروم ہیں۔انہوںنے کہا کہ مریم نواز پنجاب کے اسپتالوں کی تعریفیں کرتے نہیں تھکتیں، خود علاج باہر سے کراتی ہیں، قومی خزانے کو دونوں ہاتھوں سے لوٹنا شریف خاندان کا پسندیدہ مشغلہ ہے۔