بلوچستان کے حلقہ پی بی 8 میں ضمنی انتخاب؛ پولنگ کا عمل جاری

کوئٹہ: بلوچستان اسمبلی کے حلقہ پی بی 8 سبی کم لہڑی میں ضمنی انتخاب کے لیے پولنگ کا عمل شروع ہوگیا۔الیکشن کمیشن آف پاکستان کے مطابق پی بی 8 سبی کم لہڑی کی خالی نشست پر پولنگ کا عمل صبح 8 بجے سے جاری ہے جو شام 5 بجے تک بغیر کسی وقفے کے جاری رہے گا۔ضمنی الیکشن 124 پولنگ اسٹیشن، 324 پولنگ بوتھ قائم کردیے گئے ہیں، 124 پولنگ اسٹیشن میں 34 پولنگ اسٹیشن انتہائی حساس جبکہ 90 پولنگ اسٹیشنز کو حساس قرار دیا گیا ہے اور نارمل پولنگ اسٹیشن کوئی نہیں ہے۔حلقہ پی بی 8 سبی کے کل ووٹرز کی تعداد ایک لاکھ 16 ہزار 161 ہے جن میں خواتین ووٹرز کی تعداد 51 ہزار 938 جبکہ مرد ووٹرز کی تعداد 64 ہزار 223 ہے۔ضلعی انتظامیہ اور الیکشن کمیشن کی جانب سے انتہائی حساس پولنگ اسٹیشنز پر ایف سی کو تعینات کردیا گیا ہے۔پولنگ کے وقت سیکیورٹی کے فول پروف انتظامات کیے گئے ہیں، ایف سی سمیت پولیس، لیویز فورس، بلوچستان کانسٹیبلری سمیت 1500 سے زائد اہلکاروں کی ڈیوٹیاں لگائی گئی ہیں۔