ڈیرہ بگٹی سے گیس کے ذخائر دریافت، یومیہ 5 ملین کیوبک فٹ پیداوار کا آغاز

کوئٹہ(یو این اے ) او جی ڈی سی ایل نے بلوچستان کے ضلع ڈیرہ بگٹی کے علاقے اچ شریف میں گیس کی پیداوار کا آغاز کر دیا ہے۔ اس نئی دریافت کے ذریعے، روزانہ 5 ملین سٹینڈرڈ کیوبک فٹ گیس کی پیداوار کی جائے گی، جو گیس کی قلت پر قابو پانے میں مددگار ثابت ہوگی۔کمپنی کی تکنیکی مہارت اور جدید وسائل کے باعث اچ شریف میں 1,345 میٹر کی گہرائی تک کنوئیں کی کھدائی کی گئی، جس سے گیس کے نئے ذخائر کی دریافت ممکن ہوئی۔ اس کے نتیجے میں او جی ڈی سی ایل نے اچ گیس پروسیسنگ پلانٹ کے ذریعے اچ پاور لمیٹڈ کو گیس کی فراہمی شروع کر دی ہے۔او جی ڈی سی ایل کی بہترین اقتصادی کارکردگی کے باعث توانائی کے شعبے میں 41.02 ارب روپے کا منافع حاصل ہوا ہے، جو نہ صرف کمپنی کے لیے بلکہ پورے ملک کے توانائی کے شعبے کے لیے خوش آئند ہے۔ او جی ڈی سی ایل کی توجہ قومی توانائی کی حفاظت اور پائیدار ترقی کو فروغ دینے کے لیے پیداوار بڑھانے پر مرکوز ہے۔اس سے قبل، او جی ڈی سی ایل نے سندھ کے ضلع خیرپور میں بھی گیس کے ذخائر دریافت کیے تھے، اور ایس آئی ایف سی کے تعاون سے کمپنی کے اسٹریٹجک اقدامات توانائی کے مستقبل کے لیے اہم ثابت ہو رہے ہیں۔ یہ پیش رفت توانائی کے شعبے میں پاکستان کی خود کفالت کی جانب ایک اور اہم قدم ہے۔