حب سے کراچی جانے والے غیر ضروری راستے نیشنل ایکشن پلان کے تحت بند
حب (یو این اے )حب سے کراچی کو ملانے والے غیر ضروری راستوں کو نیشنل ایکشن پلان کے تحت بند کر دیا گیا ہے۔ ڈپٹی کمشنر حب کی ہدایت پر ایف سی، پولیس، لیویز اور دیگر قانون نافذ کرنے والے اداروں نے مشترکہ کارروائی کی اور ان راستوں کو سیل کر دیا۔حکام کے مطابق ان راستوں کا استعمال غیر قانونی سرگرمیوں میں کیا جا رہا تھا جن میں اسمگلنگ، منشیات کی ترسیل اور دیگر جرائم شامل تھے۔ ان راستوں سے غیر قانونی سامان کی ترسیل اور جرائم کی سرگرمیاں بڑھ رہی تھیں، جس کے باعث ان راستوں کو فوری طور پر بند کرنے کا فیصلہ کیا گیا۔قانون نافذ کرنے والے اداروں نے اس کارروائی کو نیشنل ایکشن پلان کے تحت ایک اہم قدم قرار دیا ہے اور عوام سے اپیل کی ہے کہ وہ قانون کی حمایت کریں تاکہ علاقے میں امن و امان کی صورتحال کو بہتر بنایا جا سکے۔ حکام نے واضح کیا کہ اس کارروائی کا مقصد علاقے میں جرائم کی روک تھام اور غیر قانونی سرگرمیوں کا قلع قمع کرنا ہے۔
