گوادر پورٹ آپریشنلائزیشن پلان حتمی شکل دینے کیلئے کابینہ کمیٹی تشکیل

حکومت نے گوادر پورٹ آپریشنلائزیشن منصوبہ کو فائنل کرنے سے متعلق اہم فیصلہ کرلیا، وفاقی کابینہ نے گوادر پورٹ آپریشنلائزیشن پلان کو حتمی شکل دینے کے لیے کابینہ کمیٹی تشکیل دے دی۔نجی نیوز کے مطابق کمیٹی کنوینر وفاقی وزیر منصوبہ بندی احسن اقبال کی صدارت میں 13 رکنی ممبران پر مشتمل ہے، جو 30 دن کے اندر اپنی رپورٹ کابینہ کو پیش کرے گی۔کمیٹی ممبران میں وزیر دفاع، وزیر بحری امور، وزیر کامرس اور وزیر مواصلات شامل ہیں، اس کے علاوہ سیکریٹری بحری امور، سیکریٹری خارجہ امور، سیکریٹری کامرس، سیکریٹری ریلوے بھی کمیٹی کا حصہ ہوں گے، اسی طرح کمیٹی میں ڈی جی این ایل سی، چیئرمین این ایچ اے، چیئرمین ایف بی آر بھی شامل ہیں جبکہ وزارت بحری امور کمیٹی کو سیکرٹریل سپورٹ فراہم کرے گی۔کمیٹی گوادر پورٹ کے آپریشنلائزیشن میں رکاوٹ پیدا کرنے والے متعدد مسائل کا جائزہ لے گی، کمیٹی اندرون ملک رابطہ کی کمی، ناکافی مالی مراعات اور سیکیورٹی کی نازک صورتحال کا جائزہ لے گی۔کمیٹی مسائل کو حل کرنے کے لیے قابل عمل اقدامات کے ساتھ پلان کو حتمی شکل دینے کے علاوہ اسلام آباد میں گوادر پورٹ سے متعلق آگاہی کے لیے بین الاقوامی کانفرنس کا انعقاد کرے گی۔اسی طرح کمیٹی گوادر پورٹ کے لیے مارکیٹنگ کی ایک جامع حکمت عملی تیار اور گوادر پورٹ کو فعال کرنے کے منصوبے پر عمل درآمد کی نگرانی کرے گی۔کمیٹی گوادر پورٹ میں وسطی ایشیائی جمہوریہ اور دیگر ممالک کے اقتصادی، تجارتی مفاد کو راغب کرنے کے لیے سفارتی رسائی کو تیز کرنے کی حکمت عملی بنائے گی۔، کمیٹی 30 دن کے اندر اپنی رپورٹ کابینہ کو پیش کرے گی۔