بلوچستان میں دیرپا امن کا قیام آپریشن کے ذریعے ممکن نہیں، رحمت صالح بلوچ

کوٹہ (انتخاب نیوز) نیشنل پارٹی کے مرکزی رہنما اور بلوچستان اسمبلی میں ڈپٹی پارلیمانی لیڈر میر رحمت صالح بلوچ نے بلوچستان میں ممکنہ بڑے آپریشن کی خبروں پر گہری تشویش کا اظہار کرتے ہوئے کہا ہے کہ ایسے اقدامات جلتے ہوئے بلوچستان پر تیل چھڑکنے کے مترادف ہوں گے۔ انہوں نے زور دیا کہ طاقت کے بجائے بات چیت اور مفاہمت کے ذریعے مسائل کا حل تلاش کیا جائے کیونکہ ماضی کے تجربات نے ثابت کیا ہے کہ طاقت کا استعمال نہ صرف مسائل کو مزید گمبھیر بناتا ہے بلکہ عوام اور ریاست کے درمیان خلیج کو بھی بڑھا دیتا ہے۔ میر رحمت صالح بلوچ نے جعفر ایکسپریس حملے کی شدید مذمت کرتے ہوئے کہا کہ کوئی بھی باشعور اور مہذب انسان بے گناہ شہریوں کے قتلِ عام کی حمایت نہیں کر سکتا کیونکہ یہ ایک غیر انسانی اور ناقابل قبول عمل ہے۔ تاہم ہمیں ان عوامل اور محرکات کا بھی جائزہ لینا ہوگا جن کی وجہ سے حالات اس نہج تک پہنچے۔ ریاستی پالیسیوں اور اقدامات کو اس نظر سے دیکھنے کی ضرورت ہے کہ کہیں وہ خود عوام میں مزید بے چینی اور اضطراب پیدا کرنے کا سبب تو نہیں بن رہے انہوں نے کہا کہ ماضی میں جب نیشنل پارٹی کے دور حکومت میں ڈاکٹر مالک بلوچ نے تمام فریقین کے ساتھ بات چیت کے ذریعے ایک مثبت ماحول پیدا کیا تھا اور بلوچستان میں امن کی بحالی کے لیے ٹھوس اقدامات کیے گئے تھے، تو پھر ان کوششوں کو ناکام کیوں بنایا گیا؟ آخر وہ مذاکرات کیوں سبوتاژ کیے گئے جن کے نتائج حوصلہ افزا ثابت ہو رہے تھے؟ یہ وہ سوالات ہیں جن پر سنجیدگی سے غور کرنے کی ضرورت ہے، کیونکہ بلوچستان میں دیرپا امن کا قیام طاقت یا آپریشن کے ذریعے ممکن نہیں، بلکہ اس کے لیے بامعنی مذاکرات، سیاسی تدبر اور عوامی اعتماد بحال کرنے کی حکمت عملی اپنانا ہوگی۔