مائنز اینڈ منرل ایکٹ، کے پی کے اسمبلی میں اے این پی اور پی ٹی آئی اراکین کے درمیان ہنگامہ آرائی

پشاور (انتخاب نیوز) خیبر پختونخوا اسمبلی کے اجلاس میں مائنز اینڈ منرل ایکٹ ترامیمی بل پر بریفنگ کے دوران ہنگامہ آرائی ہوئی۔ اے این پی کے رکن اسمبلی نثار باز کے اعتراض پر پی ٹی آئی کے اراکین نے جوابی موقف اختیار کیا، جس سے ماحول کشیدہ ہو گیا۔ نثار باز نے بلوچستان میں اس بل کے حوالے سے کسی اعتراض کا نہ ہونے پر سوالات اٹھائے جس پر پی ٹی آئی اراکین برہم ہو گئے اور جوابی اعتراضات کیے۔ اسپیکر خیبر پختونخوا اسمبلی بابر سلیم سواتی نے اس صورتحال پر برہمی کا اظہار کیا اور کہا کہ کسی کو سیاسی سکورنگ کے لیے بحث میں شریک نہیں کیا گیا۔ اسپیکر کا کہنا تھا کہ اس بل پر سیر حاصل بحث کی جائے گی اور اس کے بعد اسے کمیٹی میں بھیجا جا سکتا ہے۔ اپوزیشن لیڈر اور دیگر اراکین نے نثار باز کو منانے کی کوشش کی اور ہنگامہ آرائی کے بعد اجلاس کی صورتحال کو معمول پر آگئی۔ اسپیکر بابر سلیم سواتی نے مزید کہا کہ اس بل کو محکمہ پیٹرولیم نے تیار کر کے اسمبلی کو بھیجا ہے اور اس پر بحث کے بعد فیصلہ کیا جائے گا۔ اسپیکر نے بتایا کہ ماضی میں بھی وفاقی سطح پر متعدد بلز صوبے نے منظور کیے ہیں اور اس پر کسی قسم کا سمجھوتہ نہیں کیا جائے گا۔