مسلح افواج تیار ہیں، بھارت نے پانی روکا تو پاکستان پوری قوت سے جواب دیگا، وزیراعظم

ایبٹ آباد (انتخاب نیوز) وزیر اعظم شہباز شریف نے کہا ہے کہ پاکستان تخریب کاری کیخلاف فرنٹ لائن اسٹیٹ ہے۔ پاکستان ایک ذمہ دار ریاست ہونے کے ناطے غیر جانبدارانہ عالمی تحقیقات کیلئے تیار ہے؛ لیکن دھمکیاں ناقابل قبول ہیں۔ بھارت نے پہلگام واقعے کے بعد بے بنیاد اور بلا ثبوت الزامات لگائے۔ پاکستان نے تخریب کاری کو ہمیشہ اور ہر شکل میں مسترد کیا ہے اور اس کی مذمت کی ہے۔ ان کا کہنا تھا کہ کسی کو غلط فہمی کا شکار نہیں ہونا چاہئے، بھارت نے پانی روکنے کی کوشش کی تو پوری طاقت سے جواب دیا جائے گا، وطن عزیز کے ایک ایک انچ کا دفاع کریں گے اور کسی بھی مس ایڈونچر کو منہ توڑ جواب دیا جائے گا۔ ان خیالات کا اظہار انہوں نے ہفتے کی صبح ابیٹ آباد میں پاکستان ملٹری اکیڈمی کاکول میں کیڈٹس کی پاسنگ آوٹ کی تقریب سے بطور مہمان خصوصی خطاب کرتے ہوئے کیا۔ وزیر اعظم شہباز شریف نے کہا ہے کہ دنیا میں دہشت گردی سے سب سے زیادہ متاثرہ ملک پاکستان ہے۔ ہمارے 90 ہزار شہری تخریب کاری میں اپنی جانوں سے ہاتھ دھو بیٹھے۔ پاکستان کی معیشت نے اربوں ڈالر کا نقصان اٹھایا ہے۔ انہوں نے کہا کہ سندھ طاس معاہدے کی خلاف ورزی کرتے ہوئے پاکستان کا پانی روکا گیا تو پوری قوت سے جواب دیں گے، کسی کو بھی غلط فہمی میں نہیں رہنا چاہیے، پاکستان کی مسلح افواج ہر قسم کی صورتحال سے نمٹنے کے لیے مکمل طور پر تیار ہیں۔ پاکستان اقوام متحدہ کی سلامتی کونسل کے غیر مستقل رکن کی حیثیت سے دنیا بھر میں امن و سلامتی کا خواہاں ہے اور اس کیلئے اپنی کاوشیں جاری رکھے گا۔ تقریب سے خطاب کرتے ہوئے وزیر اعظم شہباز شریف کا کہنا تھا کہ 25 کروڑ پاکستانی عوام متحد اور اپنی مسلح افواج کے ساتھ کھرے ہیں، پاکستان نے تخریب کاری کو ہمیشہ اور ہر شکل میں مسترد کیا ہے، اور اس کی مذمت کی ہے، پاکستان دنیا میں تخریب کاری سے متاثرہ سب سے بڑا متاثرہ ملک ہے، امن ہماری خواہش ہے، اسے کمزوری نہ سمجھا جائے۔ افغانستان ہمارا پڑوسی اور برادر اسلامی ملک ہے، ہماری خواہش ہے کہ ان کے ساتھ پر امن بقائے باہمی کی بنیاد پر تعلقات ہوں لیکن بدقسمتی سے افغانستان کی سر زمین سے پاکستان میں تخریب کاری کی کارروائیاں ہو رہی ہیں۔