ایران پر فوجی حملے خطے کی سا لمیت کیلئے خطرہ ہیں، عالمی برادری اسرائیلی جارحیت رکوائے، پاکستان

اسلام آباد (انتخاب نیوز) وزارت خارجہ نے کہا ہے کہ پاکستان اسرائیل کی جانب سے اسلامی جمہوریہ ایران کے خلاف بلاجواز اور غیرقانونی جارحیت کی شدید مذمت کرتا ہے۔ ترجمان دفترخارجہ شفقت محمود نے ہفتہ وار بریفنگ دیتے ہوئے کہا کہ اسرائیلی فوجی حملے ایران کی خودمختاری اور علاقائی سا لمیت کی خلاف ورزی ہیں اور اقوام متحدہ کے چارٹر اور بین الاقوامی قانون کے بنیادی اصولوں کی کھلی خلاف ورزی ہیں۔ انہوں نے کہا کہ ایران کو اقوام متحدہ کے چارٹر کے آرٹیکل 51 کے تحت اپنے دفاع کا حق حاصل ہے، پاکستان ایران کے عوام کے ساتھ مکمل یکجہتی کا اظہار کرتا ہے اور ان اشتعال انگیز اقدامات کی پرزور مذمت کرتا ہے جو پورے خطے اور اس سے باہر کے امن، سلامتی اور استحکام کے لیے سنگین خطرہ ہیں۔ ترجمان دفتر خارجہ نے کہا کہ اسرائیلی جارحیت اقوام متحدہ کے چارٹر اور عالمی قوانین کی خلاف ورزی ہیں، ایران کواقوام متحدہ کے آرٹیکل 51 کے دفاع کا مکمل حق حاصل ہے۔ انہوں نے کہا کہ اسرائیلی جارحیت سے علاقائی امن و استحکام کو شدید خطرات لاحق ہیں، عالمی برادری اور اقوام متحدہ اسرائیلی جارحیت کو فوری روکیں اور عالمی برادری اسرائیل کو فوری طور پر انصاف کے کٹہرے میں لائے۔ ترجمان دفتر خارجہ نے کہا کہ وزیرخارجہ اسحاق ڈار نے یران، یواے ای، ترکیہ کے وزرائے خارجہ سے ٹیلی فون پر بات کی اور انہیں خطے میں امن واستحکام کی صورتحال سے آگاہ کیا۔