بلوچستان میں امن کیلئے فوج اور سول اداروں کے درمیان تعاون مضبوط بنانا ہوگا، فیلڈ مارشل عاصم منیر

تربت (انتخاب نیوز) چیف آف آرمی اسٹاف فیلڈ مارشل سید عاصم منیر، نشانِ امتیاز (ملٹری)، ہلالِ جرات نے تربت، بلوچستان کا دورہ کیا۔ اس دورے کا مقصد موجودہ سیکیورٹی صورتحال کا جائزہ لینا، ترقیاتی منصوبوں کا معائنہ کرنا اور بلوچستان کے استحکام و خوشحالی کے لیے فوجی و سول اداروں کے درمیان تعاون کو مزید مضبوط بنانا تھا۔ وزیراعلیٰ بلوچستان، چیف سیکرٹری اور دیگر حکام بھی اس موقع پر موجود تھے۔ آرمی چیف کو سیکیورٹی حالات، "فتنہ الہند” کے خلاف کامیاب آپریشنز، جاری ترقیاتی منصوبوں اور جنوبی بلوچستان میں سماجی و معاشی بہتری کے لیے اٹھائے گئے اقدامات پر تفصیلی بریفنگ دی گئی۔وزیراعلیٰ اور سول انتظامیہ کے نمائندوں سے گفتگو کرتے ہوئے انہوں نے اچھی حکمرانی، بنیادی ڈھانچے کی ترقی اور عوامی شمولیت پر مبنی اقدامات کی ضرورت پر زور دیا۔ انہوں نے کہا کہ سول و ملٹری مشترکہ کوششیں بلوچستان کے عوام کو درپیش مسائل کے حل اور صوبے کی سماجی و اقتصادی ترقی کے لیے ناگزیر ہیں۔ فیلڈ مارشل سید عاصم منیر نے ایک بار پھر اس عزم کا اعادہ کیا کہ پاک فوج بلوچستان کے عوام کے ساتھ شانہ بشانہ کھڑی ہے اور امن، خوشحالی اور پائیدار ترقی کے لیے ہر ممکن تعاون جاری رکھے گی۔ سپاہیوں سے خطاب میں آرمی چیف نے ان کے بلند حوصلے، آپریشنل تیاری اور قومی خودمختاری کے دفاع میں غیر متزلزل عزم کو سراہا۔ انہوں نے مشکل حالات میں خطے میں امن و استحکام قائم رکھنے پر جوانوں کے کردار کو خراج تحسین پیش کیا۔