راستے بند کرکے عام آدمی کو مسائل سے دوچار کرنا نامناسب عمل ہے، وزیراعلیٰ بلوچستان

کوئٹہ (انتخاب نیوز) وزیر اعلیٰ بلوچستان میر سرفراز بگٹی کی عوامی مسائل کے حل کے لئے بیکڑ میں کھلی کچہری، لوگوں کی بڑی تعداد نے وزیر اعلیٰ بلوچستان کو اپنے مسائل سے آگاہ کیا۔ وزیر اعلیٰ بلوچستان نے مسائل سنے اور حل کے لئے موقع پر ہی احکامات جاری کئے۔ وزیر اعلیٰ بلوچستان میر سرفراز بگٹی نے اس موقع پر کہا کہ عام آدمی اپنے مسائل کا حل چاہتا ہے، عام آدمی کے مسائل کا احساس ہے، حل کرنے کے لئے پرعزم ہیں، دہشت گردی اور بیڈ گورننس بڑے چیلنجز ہیں، سیاسی اسٹیک ہولڈرز کو صورتحال کی نزاکت کا احساس کرنا ہوگا، نان ایشوز سے ہٹ کر اصل مسائل اور چیلنجز پر توجہ مرکوز کرنی ہے، بلوچستان کو درپیش چیلنجز سے نمٹنے کے لئے سب کو ساتھ لے کر چلنے کے لئے تیار ہیں، دہشت گردی ایک ناسور ہے جس سے سب متاثر ہوئے ہیں، ڈیرہ بگٹی کے عام آدمی نے بھی قومی یکجہتی اور بحالی امن کے لئے جانوں کی قربانی دی ہے، ریاست سب سے مقدم ہے، عمومی معاشرتی مسائل کو ریاست سے جوڑ کر برا بھلا نہیں کہا جاسکتا، مسائل کے حل کے لئے حکومت کے دروازے کھلے ہیں، راستے بند کرکے عام آدمی کو مسائل سے دوچار کرنا نامناسب عمل ہے۔ پر امن احتجاج ہر کسی کا حق تاہم زور زبردستی اور تشدد کا راستہ اختیار کرنے نہیں دیا جا سکتا۔