لورالائی زیتون کا تیل نیو یارک انٹرنیشنل اولیو آئل مقابلے میں سلور ایوارڈ جیت گیا

لورالائی (یو این اے) بلوچستان کے ضلع لورالائی میں پیدا ہونے والا زیتون اب اپنی اعلی کوالٹی کے باعث عالمی سطح پر پہچان حاصل کر چکا ہے۔ نیو یارک انٹرنیشنل اولیو آئل کمپیٹیشن میں لورالائی کے زیتون کے تیل نے نمایاں کامیابی حاصل کرتے ہوئے سلور ایوارڈ جیتا، جس سے پاکستان کی عالمی زرعی شناخت میں مزید اضافہ ہوا ہے۔لورالائی اولیو آئل کو اس کی خالص ایکسٹرا ورجن کوالٹی، بہترین ذائقے اور غذائی افادیت کے باعث دنیا کے معیاری زیتون کے تیلوں میں شمار کیا جا رہا ہے۔ ماہرین کے مطابق یہ کامیابی نہ صرف بلوچستان بلکہ پورے پاکستان کے لیے باعث فخر ہے۔اس عالمی اعزاز نے بلوچستان کی زرعی برآمدات کے افق کو وسعت دینے کے ساتھ ساتھ مقامی کسانوں کے لیے خوشحالی اور خود کفالت کے نئے مواقع بھی ہموار کیے ہیں۔ زیتون کی کاشت اور جدید تیاری کے طریقوں سے دیہی معیشت کو فروغ ملا ہے اور کسانوں کو پائیدار آمدن کے مواقع فراہم ہوئے ہیں۔سینئر سائنٹیفک آفیسر ڈاکٹر عبداللہ بلوچ نے کہا کہ اپر بلوچستان میں زیتون کی کامیاب کاشت اس بات کا واضح ثبوت ہے کہ یہ خطہ عالمی معیار کی زرعی پیداوار دینے کی مکمل صلاحیت رکھتا ہے۔حکام کے مطابق لورالائی اولیو آئل کی یہ کامیابی بلوچستان کے زرعی شعبے میں ایک سنگِ میل ہے جو مستقبل میں پاکستان کو عالمی زرعی منڈی میں مزید مضبوط مقام دلانے میں مددگار ثابت ہوگی۔