بلوچستان کے شاہراہوں پر اراکین اسمبلی بھی غیر محفوظ، بختیارآباد میں پارلیمانی سیکریٹری کو ڈاکوؤں نے لوٹ لیا، پولیس

نصیرآباد (ویب ڈیسک) پیپلز پارٹی کے رکن صوبائی اسمبلی اور پارلیمانی سیکریٹری سنجے کمار پنجوانی کو ڈاکووں نے لوٹ لیا۔ پولیس کے مطابق واقعہ اس وقت پیش آیا جب سنجے کمار پنجوانی بھاگ سے نصیرآباد آ رہے تھے۔پولیس کا کہنا ہے کہ نوتال قومی شاہراہ پر 10 سے 12 مسلح ڈاکووں نے گاڑیوں کو روک کر واردات کی۔ اس دوران اقلیتی امور کے وزیر سے ہزاروں روپے نقدی اور موبائل فون چھین لیا گیا جبکہ ان کے محافظوں سے سرکاری اسلحہ بھی چھین لیا گیا۔پولیس کے مطابق ڈاکووں نے اسی مقام پر نصف درجن کے قریب دیگر گاڑیوں کو بھی لوٹا اور واردات کے بعد فرار ہو گئے۔ واقعے کے بعد پولیس نے علاقے کی ناکہ بندی کر کے ملزمان کی تلاش شروع کر دی ہے۔