ملکی معیشت مستحکم ہو گئی ہے، عمران خان

اسلام آباد: وزیراعظم عمران خان نے کہا ہے کہ ملکی معیشت مستحکم ہو گئی ہے، اب اسے مزید بہتر بنانا ہوگا،تمام معاشی اعشاریے مثبت سمت میں آگے بڑھ رہے ہیں، اپوزیشن مہنگائی سے متعلق حکومت کے خلاف پروپیگنڈا کررہی ہے۔ پیر کو اپنی زیر صدارت منعقد ہ پو لیٹیکل کمیٹی کے اجلاس سے خطاب کرتے ہوئے وزیراعظم عمران خان نے کہا کہ اپوزیشن مہنگائی کی صورتحال کو ٹارگٹ کررہی ہے۔وزیراعظم عمران خان نے کہا کہ تمام معاشی اعشاریے مثبت سمت میں آگے بڑھ رہے ہیں۔ اپوزیشن مہنگائی سے متعلق حکومت کے خلاف پروپیگنڈا کررہی ہے۔دو سال کی محنت سے معیشت کو پاؤں پر کھڑا کیا ہے۔وزیراعظم نے کہا کہ معاشی پالیسیوں کے ثمرات آنے والے عرصے میں عوام کو منتقل ہونا شروع ہو جائیں گے۔ اپوزیشن اپنی سیاست بچانے کے لیے عوام کو گمراہ کررہی ہے۔ معاشی ٹیم عوام کو بتائے کہ کس طرح سے گزشتہ حکومتوں نے معیشت کو نقصان پہنچایا۔وزیراعظم نے کہا کہ سوات اور حافظ آباد کے جلسوں سے ثابت ہو گیا کہ عوام کا ہم پر اعتماد قائم ہے۔ پاکستان تحریک انصاف گلگت بلتستان الیکشن کلین سویپ کرے گی۔ نجی ٹی وی کے مطابق اجلاس میں موجودہ سیاسی صورتحال پر غور کیا گیا۔ اجلاس میں ملکی معاشی صورتحال اور حکومت کی میڈیا حکمت عملی کا بھی جائزہ لیا گیا۔ نجی ٹی وی کے مطابق اعلی سطحی اجلاس میں دی جانے والی بریفنگ میں بتایا گیا کہ ملکی تاریخ میں پہلی بار سیمنٹ کی فروخت میں ریکارڈ اضافہ ہوا ہے۔