ِصوبائی حکومت وزیر اعلیٰ کی قیادت میں کامیابی کی طرف گامزن ہے، بشریٰ رند

کوئٹہ:۔پارلیمانی سیکرٹر ی برائے اطلاعات بلوچستان محترمہ بشریٰ رند نے کہا ہے کہ صوبائی حکومت وزیر اعلیٰ بلوچستان جام کمال خان کی قیادت میں کامیابی کی طرف گامزن ہے۔صوبائی مخلوط حکومت کی ڈھائی سالہ کارکردگی حوصلہ افزا اور خوش آئند ہے عوام موجودہ حکومت کی عوام دوست پالیسیوں کو سراہتے رہے ہیں موجودہ حکومت کا وژن پورے صوبے کو ترقی و خوشحالی کے دھارے میں شامل کرنا ہے۔ محترمہ بشریٰ رند نے کہا کہ صوبائی حکومت کی بہتر پالیسیوں اور ثمرات سے پورے صوبے کے عوام مستفید ہورہے ہیں۔صوبے کے تمام اضلاع میں یکساں اور برابری کی بنیاد پر ترقیاتی عمل تیزی سے جاری ہے۔ انہوں نے کہا کہ سابقہ ادوار میں صوبے کے چند ڈویژن اور چند اضلاع کے سوا دیگر اضلاع ترقی،اور خوشحالی سے محروم تھے۔ وزیر اعلیٰ بلوچستان جام کمال خان کی ایماندارانہ اور مخلصانہ قیادت کی وجہ سے اب پورا صوبہ یکساں ترقی کی جانب گامزن ہوچکا ہے۔ ان کا کہنا تھا کہ وزیر اعلیٰ تمام شعبہ جات میں اصلاحات لاکر سفارش کلچر کو ہمیشہ کے لئے دفن کردیا ہے۔ اب میرٹ پر عوام کے مسائل بھی تیزی سے حل ہونے لگے ہیں۔انہوں نے کہا کہ صوبائی کابینہ میں شامل تمام وزراء مشراء وزیر اعلیٰ بلوچستان جام کمال خان کے ساتھ ایک ٹیم کی طرح کام کررہے ہیں۔ ہم سب نے عزم کیا ہے کہ صوبہ کو جلد ترقی دیکر دیگر صوبوں کے برابر لاکر عوامی نمائندگی کا حق ادا کرینگے عوام نے ہم پر جو اعتماد کا اظہار کیا ہے۔ ان شاء اللہ تعالی عوام کے اعتماد کو ہرگز ٹھیس نہیں پہچائیں گے۔