درخواست وصول کرنے پہنچے ہیں، سماعت بعد میں ہوگی، ڈپٹی رجسٹرار سپریم کورٹ

لاہور (انتخاب نیوز) وزیراعلیٰ پنجاب کے انتخاب کے فیصلے کیخلاف ق لیگ اور پی ٹی آئی کے سپریم کورٹ لاہور رجسٹری کے باہر احتجاج ۔ڈپٹی رجسٹرار اعجاز گورایہ سپریم کورٹ لاہور پہنچ گئے۔ ڈپٹی رجسٹرار اعجاز گورایہ کے مطابق ہم درخواست وصول کرنے پہنچے ہیں، درخواست وصول کرنے کے بعد سماعت صبح ہوگی۔ اسپیکر پنجاب پرویز الٰہی نے سپریم کورٹ رجسٹری کے باہر میڈیا سے گفتگو میں کہا ہے کہ ڈپٹی اسپیکر کے اوپر آرٹیکل 6 لگتا ہے، ڈپٹی اسپیکر نے آئین توڑا ہے، توہین عدالت کی ہے۔ درخواست کو حتمی شکل دے کر جمع کرائی جائے گی۔ پرویزالٰہی نے کہا کہ آج پھر اس نے پولیس کو ایوان کے اندر بلالیا تھا، 30 سال سے میں پنجاب میں پارٹی کا صدر ہوں، پنجاب اسمبلی میں پہلے بھی پولیس کو بلا کر تشدد کیا گیا، عدالت نے ہدایت کی تھی پولیس باہر رہے گی اندر نہیں آئے گی۔ انہوں نے کہا کہ ہم جیت چکے تھے، پارلیمانی پارٹی نے مجھے امیدوار نامزد کردیا تھا، مجھے یہ ڈپٹی اسپیکر کہتا ہے آپ خود کو اور آپ کی پارٹی آپ کو ووٹ نہیں دی سکتی، اس نے وہ کام کیا ہے جو غدار بھی نہیں کرتے، اس نے جو کام کیا ہے وہ تاریخ میں کبھی نہیں ہوا۔