تخریبی کارروائیوں میں متحرک تنظیموں کی تفصیلات سینیٹ میں پیش

اسلام آباد (انتخاب نیوز) وزارت داخلہ نے 2019ء سے 2021ء کے دوران تخریبی کارروائیوں میں متحرک تنظیموں کی تفصیلات سینیٹ میں پیش کردیں۔ وزارت داخلہ کی جانب سے سینیٹ میں جمع کرائے گئے تحریری جواب میں بتایا گیا ہے کہ 2019ء سے 2021ء کے دوران اہلسنت و الجماعت، القاعدہ، بلوچستان لبریشن آرمی تخریبی کارروائیوں میں ملوث پائی گئیں۔ اس کے علاوہ بی ایل ایف، بی آر اے ایس، بلوچستان ریپبلکن آرمی بھی متحرک پائی گئیں۔ وزارت داخلہ کی رپورٹ کے مطابق حزب الاحرار، حزب التحریر، جیش اسلام، جماعت الاحرار، جئے سندھ قومی محاذ، جنداللہ، لشکر جھنگوی، لشکر اسلامی، سندھو دیش انقلابی آرمی بھی متحرک پائی گئیں۔ سینیٹ میں جمع کرائی گئی رپورٹ میں بتایا گیا ہے کہ سپاہ صحابہ، سپاہ محمد، تحریک نفاذ فقہ جعفریہ پاکستان اور ٹی ٹی پی کے علاوہ یونائیڈ بلوچ آرمی اور زینبیون بریگیڈ تخریبی کارروائیوں میں متحرک پائی گئیں۔