متاثرہ خاندان کو 25 ہزار روپے دینے کا عمل 3 ستمبر تک مکمل ہوجائیگا، وزیراعظم

چارسدہ (مانیٹرنگ ڈیسک) وزیراعظم محمد شہباز شریف نے کہا ہے کہ سیلاب اور بارشوں سے متاثرہ ہر خاندان کو 25 ہزار روپے دینے کا عمل 3 ستمبر تک مکمل کر لیا جائے گا، آخری متاثرہ شخص کی آباد کاری تک چین سے نہیں بیٹھیں گے۔تفصیل کے مطابق وزیراعظم نے سیلاب اور بارشوں سے متاثرہ خیبرپختونخوا کے ضلع چارسدہ میں متاثرین کیلئے قائم امدادی کیمپوں کا دورہ اور کیمپوں میں سہولتوں کا جائزہ لیا، کیمپ میں موجود لوگوں سے بات چیت بھی کی، متاثرین میں چیک بھی تقسیم کئے۔اس موقع پر وزیراعظم نے کہا کہ جاں بحق ہونے والوں کے لواحقین کو 10 لاکھ روپے دیئے جا رہے ہیں، سندھ کیلئے 15 ارب روپے جبکہ بلوچستان کیلئے 10 ارب روپے کی گرانٹ دی ہے، خیبرپختونخوا میں متاثرہ علاقوں کا دورہ مکمل کرنے کے بعد گرانٹ کا اعلان کریں گے۔وزیراعظم کو بریفنگ دیتے ہوئے بتایا گیا کہ 16 لاکھ کی آبادی اور تین تحصیلوں پر مشتمل چارسدہ سے تین دریائے گزرتے ہیں، یہاں پر متاثرین کیلئے خیمہ بستیاں قائم کی گئی ہیں، اس ضلع میں بارشوں سے پانچ اموات جبکہ 180 لوگ زخمی ہوئے، یہاں پر نقصانات کا سروے جاری ہے، 11 ہزار ایکڑ کپاس کا رقبہ بارش سے متاثر ہوا۔اس موقع پر سابق وفاقی وزیر آفتاب احمد خان شیرپاﺅ، عوامی نیشنل پارٹی کے صوبائی صدر ایمل ولی خان، جمعیت علمائ اسلام (ف) کے مرکزی رہنماو¿ں نے وزیراعظم کو بتایا کہ پی ٹی آئی ضمنی انتخابات کیلئے جلسے تو کر رہی ہے تاہم کوہستان میں پھنسے پانچ افراد کو نکالنے کیلئے ان کا ہیلی کاپٹر نہیں آیا جبکہ ڈی سی اور اے سی نے صوبائی حکومت سے اس حوالہ سے رابطہ بھی کیا، اب صوبائی وزیر اطلاعات نے بیان دیا ہے کہ وزیراعلیٰ کا ہیلی کاپٹر اس کام کیلئے نہیں ہے، آپ پہلے خادم پنجاب تھے اب خادم پاکستان ہیں، ہمیں آپ سے توقعات ہیں صوبائی حکومت سے کوئی توقع نہیں۔وزیراعظم نے کہا کہ بارش اور سیلاب سے متاثرہ خاندان میں 25 ہزار روپے کی نقد رقم کی تقسیم 3 ستمبر تک مکمل کر لی جائے گی، اس کیلئے 28 ارب روپے مختص کئے گئے ہیں، بے نظیر انکم سپورٹ پروگرام کے اعداد و شمار کے تحت یہاں پیسے تقسیم ہو رہے ہیں، نوشہرہ میں بھی نقد رقم کی تقسیم کا کام شروع ہو چکا ہے، سندھ اور بلوچستان میں بے پناہ تباہی ہوئی ہے، وفاق نے سندھ کیلئے 15 ارب جبکہ بلوچستان کیلئے 10 ارب روپے مہیا کئے ہیں، کالام، کوہستان سمیت دیگر متاثرہ علاقوں کا دورہ کرنے کے بعد خیبرپختونخوا میں ہونے والے نقصانات کا تخمینہ لگانے کے بعد گرانٹ کا اعلان کیا جائے گا۔انہوں نے کہا کہ میں نوشہرہ سے بھی ہو کر آیا، مجھے بتایا گیا کہ چند دن پہلے یہاں پانچ سے چھ فٹ پانی چڑھا جو اب اتر گیا ہے، نظام ہے، فی خاندان 25 ہزار روپے پورے پاکستان میں سیلاب اور بارشوں سے متاثرہ افراد میں تقسیم کئے جا رہے ہیں، چاروں صوبوں اور گلگت بلستان میں یہ پروگرام جاری ہے، خیبرپختونخوا میں بارشوں اور سیلاب سے 242 افراد جاں بحق ہوئے ہیں، لاکھوں لوگ بے گھر ہوئے ہیں، کالام، سوات، دیر میں بے پناہ تباہی ہوئی ہے، جاں بحق ہونے والے افراد کے لواحقین کو 10، 10 لاکھ روپے فی کس دے رہے ہیں، این ڈی ایم اے اور صوبوں کے ساتھ مل کر متاثرین کی ہر ممکن مدد کریں گے۔ شہباز شریف نے یقین دہانی کرائی کہ وفاق متاثرین کے ساتھ ہے، آخری متاثرہ شخص کی آباد کاری تک چین سے نہیں بیٹھیں گے، سیلاب سے فصلوں کو پہنچنے والے نقصان کا تخمینہ لگایا جا رہا ہے، صوبوں کے ساتھ مل کر جہاں تک ممکن ہوا ان کے نقصانات کا ازالہ کریں گے۔وزیراعظم نے اس موقع پر سیلاب میں جاں بحق ہونے والوں کے لواحقین سے اظہار تعزیت اور مرحومین کیلئے فاتحہ خوانی بھی کی۔