تھرکول منصوبے سے 300 سال کی بجلی بنائی جاسکتی ہے، وزیراعظم

اسلام آباد (انتخاب نیوز) وزیراعظم شہباز شریف کا کہنا ہے کہ تھرکول منصوبے سے نہ صرف 300 سال کی بجلی بنائی جاسکتی ہے بلکہ سالانہ 7 ارب ڈالر تک زرمبادلہ بھی بچا سکتے ہیں۔ تھرکول توانائی منصوبے کے فیز ٹو کی افتتاحی تقریب سے خطاب کرتے ہوئے وزیراعظم شہباز شریف کا کہنا تھا کہ تھر تیزی سے ترقی کر رہا ہے، عالمی منڈی میں کوئلے کی قیمت 67 سے 44 ڈالر پر آگئی ہے جبکہ تھر میں پیدا ہونے والی بجلی 10 روپے یونٹ ہوگی۔ انہوں نے بتایا کہ پاکستان میں کوئلے کے 4000 میگا واٹ کے بجلی گھر لگے ہوئے ہیں، تھرکول کو پوری طرح پروموٹ کریں تو پاکستان کا زرمبادلہ بچے گا اور اس وقت لگنے والے کوئلے کے پاور پلانٹ سے آلودگی نہیں ہوگی۔ ان کا کہنا تھا تھر کے کوئلے سے 300 سال تک بجلی بنائی جاسکتی ہے، توانائی کی ضروریات کی درآمد کے لیے 24 ارب ڈالر خرچ کیے ہیں، تمام کوشش کے باوجود گیس درآمد نہیں کی جاسکی، گیس اتنی مہنگی ہوگئی ہے کہ اب اس کا انتظام نہیں ہوسکا، تھر کا کوئلہ استعمال نہ کرنا بہت بڑی اجتماعی غلطی ہے، اس منصوبے سے پاکستان کا 5 سے 7 ارب ڈالر بچاسکتے ہیں۔ شہباز شریف کا کہنا تھا تھرکول ہمارے ایجنڈے میں اوپر ہے، یہاں ریل کا منصوبہ لگ گیا تو پاکستان کے چاروں کونوں میں تھر کا کوئلہ پہنچے گا، جہاں ضرورت ہے وہاں تھرکول پہنچا دیں تو سالانہ 5 سے 7 ارب ڈالر کی بچت مشکل نہیں۔