جنرل قمر جاوید باجوہ کا پاکستان ملٹری اکیڈمی کاکول اور بلوچ رجمنٹ سینٹر ایبٹ آباد کا الوداعی دورہ
راولپنڈی(آن لائن)آرمی چیف جنرل قمر جاوید باجوہ نے پاکستان ملٹری اکیڈمی (پی ایم اے)کاکول اور بلوچ رجمنٹل سینٹر ایبٹ آباد کا الوداعی دورہ کیا۔پاک فوج کے شعبہ تعلقات عام(آئی ایس پی آر) کے مطابق پی ایم اے آمد پر کور کمانڈر راولپنڈی لیفٹیننٹ جنرل ساحر شمشاد مرزا نے آرمی چیف استقبال کیا۔ آرمی چیف نے یادگار شہداء پر پھولوں کی چادر چڑھائی اور فاتحہ خوانی کی۔ انہوں نے پی ایم اے کے کیڈٹس اور افسران سے بھی بات چیت کی۔ اپنے خطاب میں آرمی چیف نے پاک فوج کے اعلیٰ تربیتی ادارے کے غیر معمولی اعلیٰ معیار اور مستقبل کی قیادت کو تیار کرنے کے لیے اس کی کوششوں کو سراہا۔ آرمی چیف نے کیڈٹس کو مشورہ دیا کہ وہ پیشہ ورانہ مہارت کے حصول میں اپنی توانائیاں صرف کریں۔بعد ازاں آرمی چیف نے بلوچ رجمنٹل سینٹر کا دورہ کیا۔ یادگار شہدا پر پھولوں کی چادر چڑھانے کے بعد انہوں نے ممتاز بلوچ رجمنٹ کے حاضر سروس اور ریٹائرڈ افسران اور دستوں سے بات چیت کی۔ آرمی چیف نے ان کی عظیم قربانیوں کو زبردست خراج تحسین پیش کیا۔قبل ازیں بلوچ رجمنٹل سینٹر پہنچنے پر چیف آف جنرل اسٹاف لیفٹیننٹ جنرل اظہر عباس نے آرمی چیف کا استقبال کیا۔
