اسلام امن اور روا داری کا دین ہے، اسلامو فوبیا کیخلاف دنیا کو کردار ادا کرنا ہوگا، بلاول بھٹو

واشنگٹن (مانیٹرنگ ڈیسک ) وزیر خارجہ بلاول بھٹو زرداری نے اقوام متحدہ پر اسلاموفوبیا سے نمٹنے کے لیے ایکشن پلان بنانے پر زور دیتے ہوئے کہا ہے کہ اسلاموفوبیا آج کے دور کا اہم مسئلہ ہے اور دنیا میں منظم طریقے سے اسلام کے خلاف نفرت پھیلائی جا رہی ہے۔ اسلامو فوبیا سے متعلق تقریب سے خطاب کے دوران انہوں نے کہا کہ اقوام متحدہ کے تحت اسلامو فوبیا کے خلاف عالمی دن پہلی دفعہ منایا جا رہا ہے، اسلاموفوبیا سے نمٹنے کے لیے سب کو ملکر کردار ادا کرنا ہو گا۔ بلاول بھٹو زرداری نے کہا کہ اسلام امن اور رواداری کا دین ہے، مذہب اسلام امن اور برداشت کا درس دیتا ہے، دنیا میں فاشٹ پالیسیوں سے مسلمانوں کو نشانہ بنایا جارہا ہے، حجاب جیسے معاملات کو سیاست میں لانے کا مقصد اسلام کو نشانہ بنانا ہے۔ انہوں نے کہا کہ تخریب کاری کا کسی مذہب سے کوئی تعلق نہیں، تخریب کاری کو اسلام کے ساتھ جوڑا جاتا رہا ہے۔