کریملن پر ڈرون حملے کے پیچھے امریکا کا ہاتھ نہیں، وائٹ ہاؤس نے روسی دعویٰ مسترد کریا

واشنگٹن (مانیٹرنگ ڈیسک) وائٹ ہاؤس نے روس کے صدارتی محل کریملن پر مبینہ یوکرینی ڈرون حملے کے حوالے سے امریکا کو ملوث کرنے کا روسی الزام مسترد کر دیا۔ واشنگٹن سے خبر ایجنسی کے مطابق وائٹ ہاؤس کے قومی سلامتی کے ترجمان جان کربی نے امریکی میڈیا سے گفتگو میں کہا کہ کریملن پر ڈرون حملے کے پیچھے امریکا کے ہونے کا روسی دعویٰ بالکل غلط ہے۔ جان کربی نے کہا امریکا یوکرینی حدود سے باہر حملہ کرنے کے لیے یوکرین کی حوصلہ افزائی نہیں کرتا۔ گزشتہ روز روس نے کہا تھا کہ کریملن پر ڈرون حملہ روسی صدر کو مارنے کی کوشش ہے۔ خبر ایجنسی کے مطابق روس نے الزام لگایا تھا کہ روسی صدر کو مارنے کی کوشش کے پیچھے امریکا کا ہاتھ ہے۔