ایران افغان سرحد پر فائرنگ، دو ایرانی، ایک افغان اہلکار ہلاک، افغان فورسز کا ایرانی سرحدی چوکی پر قبضے کا دعویٰ

تہران (مانیٹرنگ ڈیسک) ایرانی حکام نے کہا ہے کہ افغانستان کے صوبے نمروز میں ایران افغانستان سرحد پر فائرنگ کے تبادلے میں دو ایرانی سرحدی محافظوں سمیت ایک افغان اہلکار ہلاک ہو گیا۔ افغان حکومت کے ترجمان کا کہنا تھا کہ نمروز صوبے میں ایرانی بارڈر گارڈز کی جانب سے فائرنگ کا واقعہ پیش آیا ردعمل میں افغانستان کی جانب سے جوابی فائرنگ کی گئی، واقعے میں ایک افغان اہلکار ہلاک ہو گیا جبکہ دونوں جانب کچھ افراد زخمی ہوئے، اب حالات قابو میں ہیں، افغانستان کسی پڑوسی کے ساتھ تنازع نہیں چاہتا۔ دوسری جانب ایرانی خبر ایجنسی کے مطابق افغانستان سے فائرنگ کے تبادلے میں ایران کے دو سرحدی محافظ ہلاک ہو گئے ہیں۔ غیر ملکی ایجنسی کے مطابق فائرنگ کے واقعے کے اسباب معلوم نہیں ہو سکے ہیں تاہم دونوں ممالک میں پانی کے معاملے پر تنازعہ موجود ہے۔ دوسری جانب افغان فورسز کی جانب سے دعویٰ کیا گیا ہے کہ ایران کے سیستان بلوچستان کے شہر زابول کے قریب ایک ایرانی سرحدی چوکی پر قبضہ کرلیا ہے، اس وقت 2 کلومیٹر ایرانی سرزمین پر قبضہ کرلیا گیا ہے، مزید علاقے پر قبضے کی کوشش کی جارہی ہے۔