اسرائیل کے ساتھ جنگ بندی معاہدے تک پہنچنے کے قریب ہیں،فلسطینی رہنما

دوحہ(صباح نیوز) حماس کے رہنما اسماعیل ھنیہ نے جنگ بندی معاہدے کے قریب پہنچنے کا عندیہ دیتے ہوئے کہا ہے کہ حماس نے اپنا موقف قطر کے بھائیوں اور ثالثوں کو پہنچادیا ہے۔ایک بیان میں اسماعیل ھنیہ نے کہا کہ ہم جنگ بندی کے ایک معاہدے تک پہنچنے کے قریب ہیں۔ غیر ملکی میڈیا کے مطابق ذرائع نے بتایا کہ جنگ بندی کے ابتدائی 5 روزہ عارضی معاہدے میں زمینی سیز فائر اور جنوبی غزہ میں اسرائیل کے فضائی حملوں کو بھی محدود کی جائے گا۔رپورٹس کے مطابق مجوزہ معاہدے کے تحت 300 فلسطینیوں کو اسرائیلی جیلوں سے رہا کیا جائے گا جن میں بچے اور خواتین بھی شامل ہیں۔اس حوالے سے قطری وزیراعظم نے ایک بیان میں کہا تھا کہ کچھ یرغمالیوں کی رہائی کے بعد عارضی سیز فائر معاہدے میں معمولی مسائل ہیں۔