بلوچستان میں پرامن انتخابات کیلئے کوئی دقیقہ فروگزاشت نہیں کریں گے، نگران وفاقی وزیر داخلہ

کوئٹہ (انتخاب نیوز) نگران وفاقی وزیر داخلہ ڈاکٹر گوہر اعجاز نے ملک میں شفاف الیکشن کرانے اور بلوچستان میں موجودہ امن و امان کی صورتحال کا جائزہ لینے کیلئے آج کوئٹہ میں ایک اعلی سطحی اجلاس کی صدارت کی۔ اس موقع پر انھوں نے کہا کہ وہ وزیر اعظم پاکستان انوارلحق کاکڑ کی خصوصی ہدایت پر پاکستان کے چاروں صوبوں کا دورہ کررہاہوں تاکہ ملک میں آزادانہ وشفاف الیکشن منعقد کرانے کے لئے تیاریوں کا جائزہ لیں۔ انہوں نے کہا کہ لوگوں کی جان ومال کی حفاظت ہماری اولین ترجیح ہے۔ کوشش ہے کہ ملک میں جنرل الیکشن پرامن ماحول میں منعقد ہو۔انہوں نے کہا کہ وفاقی حکومت بلوچستان میں انتخابات کے لئے تمام دستیاب وسائل مہیا کرے گی نگران حکومت ملک میں آزادانہ انتخابات کیلئے کوئی دقیقہ فروگذاشت نہیں کرے گی۔ انتخابات کے دوران صوبے میں ووٹرز اور امیدواروں کو بھرپور تحفظ حاصل رہے گاانہوں نے کہا کہ ملک میں امن وامان کا قیام قانون نافذ کرنے والے اداروں کے آفیسران اور جوانوں کا ثمر ہے حکومت اپنے جوانوں اور آفیسران کی قربانیوں کو قدر کی نگاہ سے دیکھتی ہے۔انہوںنے زور دیا کہ امن وامان کو یقینی بنانے کے لئے تمام اداروں کے درمیان رابطہ مضبوط کیا جائے۔ اس موقع پر نگران صوبائی وزیر داخلہ میر زبیر جمالی نے کہا کہ تمام اداروں کی جانب سے صوبے میں عام انتخابات کے لئے جامع مکمل سیکورٹی پلان ترتیب دیا گیا ہے، انتظامی افسران کو بہترین انتظامات کو یقینی بنانے کے لئے ہر ممکن اقدامات کرنا ہونگے اور الیکشن کے انعقاد میں کوئی کوتائی برداشت نہیں کی جائے گی۔ قبل ازیں چیف سیکرٹری بلوچستان شکیل قادر خان اور ایڈیشنل چیف سیکرٹری داخلہ بلوچستان زاہد سلیم نے وفاقی وزیر کو جنرل الیکشن اور امن وامان کے حوالے سے بریفنگ دی اور بتایا کہ صوبے میں 5ہزار 28پولنگ اسٹیشنز پر پولنگ ہونگی، جس میں قومی اسمبلی کے 16سیٹوں پر 442اور صوبائی اسمبلی کے 51سیٹوں پر 1286امیدوار انتخابات لڑ رہے ہیں۔