ویب براﺅزر استعمال کرنیوالوں کو خطرہ، گوگل کروم نے سیکورٹی اپ ڈیٹ کردی

کراچی (مانیٹرنگ ڈیسک) اگر آپ گوگل کروم ویب براﺅزر استعمال کرتے ہیں تو فوری طور پر اسے اپ ڈیٹ کرلیں۔ گوگل کی جانب سے دنیا کے مقبول ترین ویب براﺅزر میں موجود ایک بڑی سیکورٹی خامی دور کرنے کے لیے اپ ڈیٹ کی گئی ہے۔ خیال رہے کہ دنیا بھر میں انٹرنیٹ استعمال کرنے والے 50 سے 60 فیصد افراد براﺅزنگ کے لیے گوگل کروم کو ترجیح دیتے ہیں، تو اس میں موجود سیکورٹی کمزوری بہت بڑا خطرہ ثابت ہوسکتی ہے۔ کمپنی کی جانب سے اس سیکورٹی کمزوری کو سنگین قرار دیا گیا ہے جس سے ڈیسک ٹاپ کمپیوٹرز اور لیپ ٹاپس پر گوگل کروم استعمال کرنے والوں کو خطرہ لاحق ہوسکتا ہے۔ گوگل نے بتایا کہ CVE-2024-4671 نامی سیکورٹی بگ سے صارفین کو خطرہ لاحق ہے۔ یہ سیکورٹی کمزوری کروم کے اس حصے میں دریافت ہوئی جو ویب رینڈرنگ میں مدد فراہم کرتا ہے اور اسی وجہ سے براﺅزر کو فوری اپ ڈیٹ کرنا ضروری ہے۔ اس کمزوری کو استعمال کرکے ہیکرز صارفین کو خصوصی طور پر تیار کردہ نقصان دہ ویب سائٹ کی جانب لے جاتے ہیں اور انہیں صارف کے ڈیٹا تک رسائی مل جاتی ہے یا وہ سسٹم کو کنٹرول کرنے کے قابل ہو جاتے ہیں۔ اس سیکورٹی خامی کی سنگینی کا اعتراف کرتے ہوئے گوگل کی جانب سے فوری طور پر اپ ڈیٹ کی گئی۔ گوگل کی جانب سے اس سیکورٹی کمزوری کے حوالے سے زیادہ تفصیلات جاری نہیں کی گئیں۔