شریف اور زرداری خاندان نے دولت بنانے کیلئے بجلی کا نظام تباہ کردیا، عمران خان

راولپنڈی (انتخاب نیوز) سابق وزیراعظم عمران خان نے اڈیالہ جیل میں صحافیوں سے گفتگو کرتے ہوئے کہا کہ رجیم چینج آپریشن اور 9 مئی، دونوں ہمارے خلاف سازش تھی اور ہمیں ہی مجرم بنا کر ہمیں ہی سزا دی جارہی ہے۔ دونوں معاملات میں ہم نے انکوائری کی ڈیمانڈ کی اور دونوں میں انکوائری نہیں کی گئی۔ میں آج بھی یہی کہتا ہوں کہ جس نے 9 مئی کی فوٹیج چرائی اسی نے ہی 9 مئی کروائی۔ ہمارے خلاف سازش ہوئی اور ہماری حکومت گرائی گئی۔ سائفر ہمارے خلاف آیا تھا اور اس کا کیس مجھ پر اور شاہ محمود قریشی پر بنا دیا گیا۔ اس سب کا ایک ہی مقصد ہے کہ مجھے ملٹری کی حراست میں لے لیا جائے۔ اس وقت پاکستان بنانا ری پبلک بن چکا ہے جہاں کوئی آئین اور قانون نہیں ہے۔ مہنگائی کا یہ حال ہے کہ عوام کا جینا مشکل ہو گیا ہے۔ لوگ خود کشیاں کررہے ہیں۔ اب دنیا بھر میں یہ خبریں چل رہی ہیں کہ پاکستان میں بجلی کا بل گھر کے کرائے سے زیادہ ہوگیا ہے۔ آئی پی پیز کا بحران روز بروز بڑھتا جارہا ہے۔ مہنگائی میں پسے عوام پر ہر مہینے بجلی کا بل قہر بن کر گرتا ہے۔ ان چند خاندانوں نے خاص طور پر شریف اور زرداری خاندان نے اپنے ذاتی فائدے اور دولت بنانے کے لیے ملک میں بجلی کا نظام تباہ کردیا ہے۔ دو سال میں معیشت مکمل تباہ ہوگئی ہے، فیصل آباد میں فیکٹریاں بند ہوگئی ہیں اور ان کی ساری توجہ تحریک انصاف اور مجھے کرش کرنے پر لگی ہوئی ہے۔