ڈونلڈ ٹرمپ کو قتل کرنے کی مبینہ ایرانی سازش کا الزام، افغان شہری پر فردِ جرم عائد

نیویارک (صباح نیوز) ڈونلڈ ٹرمپ کو قتل کرنے کی مبینہ ایرانی سازش کے الزام میں امریکہ میں افغان شہری پر فردِ جرم عائدکردی گئی۔غیرملکی خبررساں ادارے کے مطابق امریکی حکومت نے ایک افغان شہری پر ڈونلڈ ٹرمپ کے صدر منتخب ہونے سے قبل ان کے قتل کی مبینہ ایرانی سازش تیار کرنے کے الزامات عائد کئے ہیں۔محکمہ انصاف نے 51 سالہ فرہاد شکیری کے خلاف فرد جرم عائد کی ہے ۔فرہاد پر الزام ہے کہ انہیں ٹرمپ کو قتل کرنے کا منصوبہ بنانے کا کام سونپا گیا تھا۔امریکی حکومت کا کہنا ہے کہ شکیری کو گرفتار نہیں کیا گیا اور خیال کیا جا رہا ہے کہ وہ ایران میں ہیں۔مینہٹن کی عدالت میں دائر کی گئی ایک مجرمانہ شکایت میں استغاثہ نے الزام لگایا ہے کہ ایران کے پاسداران انقلاب کے ایک اہلکار نے ستمبر میں شکیری کو ہدایت کی تھی کہ وہ ٹرمپ کی نگرانی اور قتل کا منصوبہ بنائیں۔امریکی اٹارنی جنرل میرک گارلینڈ نے ایک بیان میں کہا کہ محکمہ انصاف نے ایرانی حکومت کے ایک ایجنٹ پر فردِ جرم عائد کی ہے جسے ایرانی حکومت نے مجرمانہ ساتھیوں کے نیٹ ورک کو چلانے کی ہدایت کی تھی تاکہ وہ نومنتخب صدر ڈونلڈ ٹرمپ سمیت اپنے دیگر اہداف کے قتل کی سازشوں کو عملی جامہ پہنا سکے۔ محکمہ انصاف نے ایران کی ناقد ایک امریکی صحافی کو قتل کرنے کے لیے مبینہ طور پر بھرتی کئے گئے دو دیگر افراد پر بھی فردِ جرم کی ہے۔محکمہ انصاف نے دو دیگر افراد کی شناخت 49 سالہ کارلیسل رویرا اور 36 سالہ جوناتھن لوڈ ہولٹ کے نام سے کی ہے۔دونوں نیو یارک کے جنوبی ضلع کی عدالت میں پیش ہوئے اور مقدمے کی سماعت کے دوران انہیں حراست میں لے لیا گیا۔