کوئٹہ میں عیدالفطر کیلئے سیکورٹی پلان مرتب، اہم مقامات پر اسنائپر تعینات ہوں گے

کوئٹہ (یو این اے) ایس ایس پی آپریشنز کوئٹہ محمد بلوچ نے کہا ہے کہ کوئٹہ کے لیے عیدالفطر کا سیکیورٹی پلان ترتیب دے دیا گیا، اس موقع پر شہر میں ڈھائی ہزار سے زائد اہلکار تعینات کیے جائیں گئے شہر میں اہم سرکاری اور حساس مقامات پر اسنائپر تعینات کیے جائیں گے، بازاروں اور شاپنگ سینٹرز کے باہر سادہ کپڑوں میں اہلکار ابھی بھی تعینات ہیں۔ایس ایس پی آپریشنز کوئٹہ نے بتایا ہے کہ شہر کے 5 مقامات پر کوئیک ریسپانس فورس بھی تعینات ہے انہوں نے کہا ہے کہ شہر میں پیٹرولنگ اور چیکنگ کا سلسلہ بھی جاری ہے، شہر میں چاند رات اور عید کے لیے خصوصی ٹریفک پلان بھی مرتب کیا گیا ہے۔ عیدالفطر کے دوران عیدگاہوں اور نماز عید کے اجتماعات کے قریب 500 گز میں پارکنگ کی اجازت نہیں ہو گی اور خلاف ورزی کرنے والے کے خلاف تادیبی کارروائی عمل میں لائی جائے گی۔