بلوچستان کے حالات ہر وقت ایسے نہیں ہوں گے ہماری نوجوان نسل کا مستقبل محفوظ ہے، ڈاکٹر عبدالمالک بلوچ

کوئٹہ (آن لائن) نیشنل پارٹی کے مرکزی صدر سابق وزیرا علیٰ بلوچستان رکن صوبائی اسمبلی ڈاکٹر عبدالمالک نے کہا ہے کہ بلوچستان کے حالات ہر وقت ایسے نہیں ہونگے ہماری نوجوان نسل کا مستقبل محفوظ ہے ۔ لٹریچر زندگی ہے زندگی ادب کے بغیر بے معنی ہے ادب کو فروغ دینا چاہیئے۔ ان خیالات کا اظہار انہوں نے گزشتہ روز سردار بہادر خان یونیورسٹی میں عرشیہ خان بڑیچ کی کتاب کی تقریب رونمائی کے موقع پر منعقدہ تقریب سے خطاب کرتے ہوئے کیا۔ اس موقع پر وائس چانسلر ڈاکٹر روبینہ ، ڈپٹی کمشنر کوئٹہ کیپٹن (ر) مہر اللہ بادینی ،پرو وائس چانسلر راحیلہ عمرسمالانی ، رجسٹرار ڈاکٹر زینب اکرم، ڈین ڈاکٹر عالیہ ایوب، چیئر پرسن ڈیپارٹمنٹ ایجوکیشن ڈاکٹر خدیجہ کریم، فیکلٹی ،نیشنل پارٹی کے صوبائی صدر اسلم بلوچ ، مرکزی رہنماءکیسکو بورڈ کے چیئرمین عبدالخالق بلوچ، ڈاکٹر عرفان ، ڈاکٹر محمد اعظم بنگلزئی اور طالبات کی بڑی تعداد بھی شریک تھیں۔ ڈاکٹر عبدالمالک بلوچ نے طالبات سے مخاطب ہوکر کہا کہ عرشیا خان بڑیچ نے فلسفیانہ انداز میں کتاب لکھی ہے آپ لوگ قطعاً مایوس نہ ہو بلوچستان کے حالات ہر وقت ایسے نہیں ہونگے آپ کا مستقبل محفوظ ہے۔ ایس بی کے یونیورسٹی ہمارا ادارہ ہے اس کے معیار کو بہتر کرنا اور مشکلات کو دور کرنا ہماری ذمہ داری ہے انہوں نے کہا کہ ہماری نوجوان نسل عرشیا بڑیچ کی تقلیدکرے کیونکہ علم و دانش کا سرچشمہ کتاب ہے کتاب بینی کو فروغ دیں۔ سوشل میڈیا آپ کو انفارمیشن دے سکتا ہے لیکن علم و دانش نہیں ایس بی کے کی وائس چانسلر ڈاکٹر روبینہ نے اپنی طالبہ عرشیا بڑیچ کی کاوشوں کو سراہا اور کہاکہ یہ ہماری یونیورسٹی کے لئے باعث فخر ہے جو کتاب میری طالبہ نے تخلیق کی ہے ۔ اس موقع پر کتاب کے بارے میں ڈاکٹر عرفان ، ڈاکٹر محمد اعظم بنگلزئی ، ڈاکٹر اسحاق بلوچ ، سردار ادریس خان بڑیچ نے اپنے خیالات کا اظہار کیا۔ اور امید ظاہر کی کہ اس رجحان کو مزید تقویت اور فروغ ادارتی سطح پر دیا جائے۔ کتاب مصفنہ عرشیہ خان بڑیچ نے تفصیل کے ساتھ اپنے خیالات کا اظہار کیا اور کہا کہ کتاب کا نام سوچو کی سمندر میں انسانی تحقیقات، انسانی رویوں اور کو اپنے فکر اور خیال کے مطابق قلمبند کیا ہے ۔